Estoniya, Belgiya va Bolgariya o‘zining dengiz va daryo portlarini Rossiya kemalari uchun yopdi, deb xabar beradi Tengrinews.
Estoniya hukumati 17-apreldan boshlab Rossiya kemalarining, shuningdek, 24-fevraldan keyin Rossiya bayrog‘ini boshqasiga almashtirgan barcha kemalar uchun o‘z portlariga kirishni taqiqlaganini ma’lum qildi. Mamlakat Iqtisodiyot va infratuzilma vazirining ta’kidlashicha, taqiq Yevropa Ittifoqi sanksiyalari doirasida joriy etilgan.
Vazirlikning aniqlik kiritishicha, Estoniya portlari faqatgina falokatga uchragan Rossiya kemalarini istisno tariqasida kiritishi mumkin, biroq shunda ham politsiya departamenti va chegara xizmatining maxsus ruxsati talab etiladi.
Bolgariya hukumati ham shu kabi qarorni qabul qilganini e’lon qildi. Respublika Dengiz ma’muriyati ma’lumotlariga ko‘ra, Bolgariya dengiz va daryo portlariga Rossiya bayrog‘i ostida ro‘yxatdan o‘tgan barcha kemalarning kirish taqiqlanadi. Bolgariya qarori ham xuddi Estoniya hukumatiniki kabi Yevroittifoq sanksiyalariga bog‘liq.
Shu bilan birga, Belgiyada ham Rossiya bayrog‘i ostidagi kemalarning o‘z portlariga kirishini taqiqlovchi qaror kuchga kirgan. Sanksiyalarni qo‘llash bo‘yicha Yevropa qoidalariga ko‘ra, YI portlarida ma’lum bir kemalar maxsus ruxsatnoma orqali kirishi mumkin va bunda aniq biror port mas’uliyatni o‘z zimmasiga oladi.
“Ular qatorida xaridlar, import yoki Yevropa Ittifoqiga gaz va neftni tashish, shuningdek, farmatsevtika, tibbiyot, qishloq xo‘jaligi, oziq-ovqat mahsulotlari, jumladan, bug‘doy va o‘g‘itlar bor”, — deyiladi xabarda.
Bundan oldin Bayden Rossiya nefti va gazini import qilishni taqiqlovchi qonunni imzolagani, Yevropa Ittifoqi Rossiyaga qarshi yangi sanksiyalar paketi ustida ishlayotgani to‘g‘risida xabar berilgandi.
Izoh (0)