Январь–март ойларида 543 та ҳоким қарори ҳақиқий эмас деб топилди — Олий суд

2022 йилнинг биринчи чорагида республика бўйича 543 та ҳоким қарори ҳақиқий эмас деб топилган. Бу ҳақда 14 апрель куни АОКАда бўлиб ўтган матбуот анжуманида Олий суд раисининг биринчи ўринбосари Робахон Маҳмудова маълум қилди, дея хабар бермоқда «Дарё» мухбири.

Робахон Маҳмудованинг таъкидлашича, суд томонидан 2022 йилнинг январь—март ойларида 3508 та маъмурий иш кўриб чиқилган.

«Шундан 1735 таси қаноатлантирилган. Жумладан, оммавий низолар бўйича маъмурий органлар кесимида маҳаллий ҳокимликларга тааллуқли 1429 та иш кўрилиб, 543 таси қаноатлантирилган. Яъни 543 та ҳоким қарори ҳақиқий эмас деб топилган ва 89 тасининг иш юритуви тугатилган. Буларнинг орасида Молия, Адлия, Қурилиш, Ички ишлар вазирликлари ва Божхона қўмитаси билан боғлиқ ишларимиз ҳам мавжуд», — деди Олий суд расмийси.

Анжуманда Робахон Маҳмудова 2021 йил давомида республика судлари томонидан кўриб чиқилган ишлар сони бўйича ҳам маълумот берди.

«Ўтган йили 47 659 та жиноят, 428 869 та маъмурий ҳуқуқбузарлик, 518 112 та фуқаролик, 175 445 та иқтисодий ва 15 146 та оммавий низолар бўйича ишлар кўриб чиқилган», — деди Олий суд раиси ўринбосари.

Анжуманда маълум қилинишича, 2021 йилда 2020 йилга нисбатан фуқаролик ишлари ҳажми 78 фоизга, иқтисодий ишлар 68 фоизга, жиноят ишлари 57 фоизга ошган.