2022-yilning birinchi choragida hududlarda 90 dona yangi avtobus va mikroavtobuslar xarid qilish rejalashtirilgan bo‘lib, amalda 111 ta transport vositalari xarid qilingan. Bu haqda Milliy matbuot markazida Transport vazirligi mutasaddilari ishtirokida bo‘lib o‘tgan matbuot anjumanida ma’lum qilindi, deb xabar bermoqda “Daryo” muxbiri.
Qayd etilishicha, 2022-yilning birinchi choragida 45 ta yangi ichki avtobus yo‘nalishlarini tashkil etish va optimallashtirish rejalashtirilgan bo‘lib, amalda 4 ta yoki 9 foizga bajarilgan. Shuningdek, Buxoro viloyatining Olot va Buxoro tumanlarida loyiha qiymati qariyb 5 milliard so‘m bo‘lgan 2 ta yangi zamonaviy oxirgi to‘xtash bekatlari qurilgan.
Vazirlar Mahkamasining qarori bilan shu kunga qadar hududlarda norentabel avtobus yo‘nalishlari uchun tadbirkorlik subyektlariga mahalliy budjetdan qariyb 810,0 mln so‘m subsidiya ajratilgan.
Mazkur axborot tizimi 2022-yilning yanvar—fevral oylarida test rejimida ishga tushirildi. 2022-yilning mart oyidan boshlab Transport vazirligi tomonidan yo‘lovchi tashish yo‘nalishlarini ochiq tenderlar orqali tashuvchilarga biriktirish bo‘yicha elektron axborot tizimi to‘liq ishga tushirildi. Bugungi kunda jami 1518 ta amaldagi shartnomalar tizimga kiritilgan.
Shuningdek, Toshkent shahar jamoat transporti uchun 20 ta elektrobus xarid qilinib, yo‘nalishlarda foydalanishga topshirilgan.
2022-yilning yanvar—mart oylarida Buxoro aeroporti orqali Rossiyaga yanvar oyida 13 ta, fevral oyida 16 ta, mart oyida 10 ta muntazam aviaqatnovlar reysi amalga oshirilgan. Aprel oyida Rossiyaga muntazam aviaqatnovlar soni haftasiga 27 ta reysni tashkil etish rejalashtirilgan.
O‘tgan uch oy mobaynida Uzbekistan Airways aviakompaniyasi xizmatlaridan jami 787 ming 902 nafar yo‘lovchi foydalangan. Shuningdek, 5800 dan ortiq reyslar amalga oshirilgan. Shulardan mahalliy yo‘nalishlarda shaharlararo amalga oshirilgan aviaqatnovlar soni 1488 tani tashkil etadi. Tashilgan yo‘lovchilar soni 198,7 mingdan ortiq.
Bundan tashqari, hozirda yagona xususiy “Qanotsharq” aviakompaniyasi tomonidan xorijiy yo‘nalishlarda 204 ta reys amalga oshirilgan. Shuningdek, 28,7 ming yo‘lovchi tashilgan.
“O‘zbekiston—Rossiya” o‘rtasidagi kelishuvga ko‘ra “Agroekspress” agromahsulotlarni tashishni “yashil koridorlar” tuzgan holda yo‘lga qo‘yish va o‘rnatilgan tarif stavkalariga 65 foizgacha imtiyozlar 2022-yil oxiriga qadar taqdim etilgan.
2022-yil yanvar—mart oylarida xalqaro yuk tashuvlari hajmi (eksport, import va tranzit) – 12,5 million tonnani tashkil etgan. Transport va yo‘l xo‘jaligi sohasida 110 ta investitsiya loyihalari doirasida yanvar—mart oylari yakuni bo‘yicha 107,02 million dollar o‘zlashtirish rejalashtirilgan bo‘lib, amalda 108,02 million dollar o‘zlashtirilishi kutilmoqda. Transport sohasida jami 216,6 million dollar transport xizmatlari eksporti amalga oshirilgan. Mahalliy aviaqatnovlar soni haftasiga 48 tadan 56 tagacha ko‘paytirilgan.
Izoh (0)