Январь—март ойларида Uzbekistan Airways авиакомпанияси хизматларидан жами 787 минг 902 нафар йўловчи фойдаланган

2022 йилнинг биринчи чорагида ҳудудларда 90 дона янги автобус ва микроавтобуслар харид қилиш режалаштирилган бўлиб, амалда 111 та транспорт воситалари харид қилинган. Бу ҳақда Миллий матбуот марказида Транспорт вазирлиги мутасаддилари иштирокида бўлиб ўтган матбуот анжуманида маълум қилинди, деб хабар бермоқда «Дарё» мухбири.

Қайд этилишича, 2022 йилнинг биринчи чорагида 45 та янги ички автобус йўналишларини ташкил этиш ва оптималлаштириш режалаштирилган бўлиб, амалда 4 та ёки 9 фоизга бажарилган. Шунингдек, Бухоро вилоятининг Олот ва Бухоро туманларида лойиҳа қиймати қарийб 5 миллиард сўм бўлган 2 та янги замонавий охирги тўхташ бекатлари қурилган.

Вазирлар Маҳкамасининг қарори билан шу кунга қадар ҳудудларда норентабел автобус йўналишлари учун тадбиркорлик субъектларига маҳаллий бюджетдан қарийб 810,0 млн сўм субсидия ажратилган.

Мазкур ахборот тизими 2022 йилнинг январь—февраль ойларида тест режимида ишга туширилди. 2022 йилнинг март ойидан бошлаб Транспорт вазирлиги томонидан йўловчи ташиш йўналишларини очиқ тендерлар орқали ташувчиларга бириктириш бўйича электрон ахборот тизими тўлиқ ишга туширилди. Бугунги кунда жами 1518 та амалдаги шартномалар тизимга киритилган.

Шунингдек, Тошкент шаҳар жамоат транспорти учун 20 та электробус харид қилиниб, йўналишларда фойдаланишга топширилган.

2022 йилнинг январь—март ойларида Бухоро аэропорти орқали Россияга январь ойида 13 та, февраль ойида 16 та, март ойида 10 та мунтазам авиақатновлар рейси амалга оширилган. Апрель ойида Россияга мунтазам авиақатновлар сони ҳафтасига 27 та рейсни ташкил этиш режалаштирилган.

Ўтган уч ой мобайнида Uzbekistan Airways авиакомпанияси хизматларидан жами 787 минг 902 нафар йўловчи фойдаланган. Шунингдек, 5800 дан ортиқ рейслар амалга оширилган. Шулардан маҳаллий йўналишларда шаҳарлараро амалга оширилган авиақатновлар сони 1488 тани ташкил этади. Ташилган йўловчилар сони 198,7 мингдан ортиқ.

Бундан ташқари, ҳозирда ягона хусусий «Қаноцҳарқ» авиакомпанияси томонидан хорижий йўналишларда 204 та рейс амалга оширилган. Шунингдек, 28,7 минг йўловчи ташилган.

«Ўзбекистон—Россия» ўртасидаги келишувга кўра «Агроэкспресс» агромаҳсулотларни ташишни «яшил коридорлар» тузган ҳолда йўлга қўйиш ва ўрнатилган тариф ставкаларига 65 фоизгача имтиёзлар 2022 йил охирига қадар тақдим этилган.

2022 йил январь—март ойларида халқаро юк ташувлари ҳажми (экспорт, импорт ва транзит) – 12,5 миллион тоннани ташкил этган. Транспорт ва йўл хўжалиги соҳасида 110 та инвестиция лойиҳалари доирасида январь—март ойлари якуни бўйича 107,02 миллион доллар ўзлаштириш режалаштирилган бўлиб, амалда 108,02 миллион доллар ўзлаштирилиши кутилмоқда. Транспорт соҳасида жами 216,6 миллион доллар транспорт хизматлари экспорти амалга оширилган. Маҳаллий авиақатновлар сони ҳафтасига 48 тадан 56 тагача кўпайтирилган.