O‘zbekiston xalq artisti Yulduz Usmonova 11-aprel kuni poytaxtda o‘z tibbiy klinikasini tantanali ravishda ochdi. “Chotki TV” jurnalisti ochilish marosimiga tashrif buyurib, Yulduz Usmonova bilan suhbatlashdi.
— Klinikamizga kelgan shifokorlar uning texnikalari va bino dizaynini ko‘rib, hayron qolishyapti. “Kiritilgan shuncha sarmoyani qanday qilib chiqarib oladi?”, degan savol ko‘pchilikni o‘ylantiryapti. Gap faqat daromadda emas. Yaratilgan qulayliklarning bari xalq uchun qilindi. Shu yerlik aholi sog‘lig‘ini tiklash uchun shahar markaziga borib ham ancha pulini tashlab kelyapti. Ham puli, ham vaqti ketadi. Shu pulni uyining yonginasidagi klinikaga sarflashning nimasi yomon?!
Tuman aholisining deyarli barchasi uy-joyga muhtoj bo‘lgan va qandaydir imtiyoz bilan uyli bo‘lgan odamlar. Ularning orasida ilmli, ayniqsa tibbiyot xodimi bo‘lganlari juda ko‘p. Yangi klinikaning tashkil etilishi ularga ham qulaylik tug‘diradi. Ko‘plab xodimlar tumanidan ish bilan ta’minlanadi, — deydi Yulduz Usmonova.
Yulduz Usmonovaning aytishicha, klinikani ochish oson bo‘lmagan.
— Men ilgari ashulamni aytib yuraverar ekanman. Biznesmenlarni faqat boy odam deb bilar ekanmiz. Bechora biznesmenlarning qancha muammosi borligini o‘zi bilar ekan, xolos. Hokimlik-ku, yakka o‘zi qaror qabul qilishga qo‘rqadi. Tumanga ariza bersangiz, shaharga jo‘natadi, undan keyin boshqasiga yuboradi, xullas, hammasi asabbuzarlik. Hokimlikdagilar klinika ochishga ruxsat berguniga qadar bir yildan ortiqroq vaqt o‘tdi.
Undan keyin bank burnimizdan ip o‘tkazib sudrashdi. Yulduz Usmonova va Mansur Agaliyev necha yildan beri soliq to‘laydi. Nahotki, shu vaqtgacha ishonchga kirmagan bo‘lsak, deb xafa bo‘ldim. Masalan, bu yilgi konsertning o‘zidan 600 million so‘m soliq to‘ladik. Nafaqat “Xalqlar do‘stligi” boshqa yerlardagi konsertlar uchun ham soliq to‘laymiz.
Bank xodimlaridan qattiq ranjidim. Men-ku mayli, boshqa yoshlar ham biznes g‘oyasi bilan bankka borsa, shunday bo‘laveradimi? Kreditni ham 22 foizdan berishdi, bu kichkina mablag‘ emas. Yulduz Usmonova bo‘lib shuncha qiyinchilik bilan kredit olsam bu ketishda biz hech qachon o‘smaymiz.
Bank boshqaruvchilari 2-3 yilda o‘zgarib tursa ham burni osmon-u, falakda ekan. Ularda muomala yo‘q. Endi shularni ko‘rmay, deb o‘tiribman.
Bunaqada o‘sish bo‘lmaydi. Yoshlarga yo‘l beringlar. Uyini tikib, mashinasini tikib ish boshlayman deyotganlarga imkon berish kerak-ku. Imkon berilsa, yana Alisher Usmonovlar paydo bo‘ladi, — deydi O‘zbekiston xalq artisti Yulduz Usmonova.
Xonanda suhbat davomida klinikaga litsenziya olishda ham tanish-bilishchilikka yo‘l qo‘ymay, el qatori qonun doirasida yo‘l tutgani haqida gapirdi.
“Ochig‘i, klinikaning ruxsatnomasini bir-ikki so‘m berib yoki Yulduz Usmonovaman deb olganim yo‘q. Sog‘liqni saqlash vazirligidan tanish-bilish qilsam ham bo‘lardi. Atayin ustiga bir tiyin pul bermay, hammasini qonun doirasida qildim. Bu o‘zimizga ham yaxshi bo‘ldi. Ammo ishni ancha sudrashdi”, — deydi xonanda.
Yangi ochilgan klinika Yulduz Usmonovaning birinchi tadbirkorlik ishi emas. O‘zbekiston xalq artistining Sergeli tumanida tikuv fabrikasi ham bor. Intervyulardan birida Yulduz Usmonova fabrikadan katta daromad olmasa-da, yopa olmasligi haqida aytib o‘tgandi.
Izoh (0)