Ўзбекистон халқ артисти Юлдуз Усмонова 11 апрель куни пойтахтда ўз тиббий клиникасини тантанали равишда очди. «Chotki TV» журналисти очилиш маросимига ташриф буюриб, Юлдуз Усмонова билан суҳбатлашди.
— Клиникамизга келган шифокорлар унинг техникалари ва бино дизайнини кўриб, ҳайрон қолишяпти. «Киритилган шунча сармояни қандай қилиб чиқариб олади?», деган савол кўпчиликни ўйлантиряпти. Гап фақат даромадда эмас. Яратилган қулайликларнинг бари халқ учун қилинди. Шу ерлик аҳоли соғлиғини тиклаш учун шаҳар марказига бориб ҳам анча пулини ташлаб келяпти. Ҳам пули, ҳам вақти кетади. Шу пулни уйининг ёнгинасидаги клиникага сарфлашнинг нимаси ёмон?!
Туман аҳолисининг деярли барчаси уй-жойга муҳтож бўлган ва қандайдир имтиёз билан уйли бўлган одамлар. Уларнинг орасида илмли, айниқса тиббиёт ходими бўлганлари жуда кўп. Янги клиниканинг ташкил этилиши уларга ҳам қулайлик туғдиради. Кўплаб ходимлар туманидан иш билан таъминланади, — дейди Юлдуз Усмонова.
Юлдуз Усмонованинг айтишича, клиникани очиш осон бўлмаган.
— Мен илгари ашуламни айтиб юраверар эканман. Бизнесменларни фақат бой одам деб билар эканмиз. Бечора бизнесменларнинг қанча муаммоси борлигини ўзи билар экан, холос. Ҳокимлик-ку, якка ўзи қарор қабул қилишга қўрқади. Туманга ариза берсангиз, шаҳарга жўнатади, ундан кейин бошқасига юборади, хуллас, ҳаммаси асаббузарлик. Ҳокимликдагилар клиника очишга рухсат бергунига қадар бир йилдан ортиқроқ вақт ўтди.
Ундан кейин банк бурнимиздан ип ўтказиб судрашди. Юлдуз Усмонова ва Мансур Агалиев неча йилдан бери солиқ тўлайди. Наҳотки, шу вақтгача ишончга кирмаган бўлсак, деб хафа бўлдим. Масалан, бу йилги концертнинг ўзидан 600 миллион сўм солиқ тўладик. Нафақат «Халқлар дўстлиги» бошқа ерлардаги концертлар учун ҳам солиқ тўлаймиз.
Банк ходимларидан қаттиқ ранжидим. Мен-ку майли, бошқа ёшлар ҳам бизнес ғояси билан банкка борса, шундай бўлаверадими? Кредитни ҳам 22 фоиздан беришди, бу кичкина маблағ эмас. Юлдуз Усмонова бўлиб шунча қийинчилик билан кредит олсам бу кетишда биз ҳеч қачон ўсмаймиз.
Банк бошқарувчилари 2-3 йилда ўзгариб турса ҳам бурни осмон-у, фалакда экан. Уларда муомала йўқ. Энди шуларни кўрмай, деб ўтирибман.
Бунақада ўсиш бўлмайди. Ёшларга йўл беринглар. Уйини тикиб, машинасини тикиб иш бошлайман деётганларга имкон бериш керак-ку. Имкон берилса, яна Алишер Усмоновлар пайдо бўлади, — дейди Ўзбекистон халқ артисти Юлдуз Усмонова.
Хонанда суҳбат давомида клиникага лицензия олишда ҳам таниш-билишчиликка йўл қўймай, эл қатори қонун доирасида йўл тутгани ҳақида гапирди.
«Очиғи, клиниканинг рухсатномасини бир-икки сўм бериб ёки Юлдуз Усмоноваман деб олганим йўқ. Соғлиқни сақлаш вазирлигидан таниш-билиш қилсам ҳам бўларди. Атайин устига бир тийин пул бермай, ҳаммасини қонун доирасида қилдим. Бу ўзимизга ҳам яхши бўлди. Аммо ишни анча судрашди», — дейди хонанда.
Янги очилган клиника Юлдуз Усмонованинг биринчи тадбиркорлик иши эмас. Ўзбекистон халқ артистининг Сергели туманида тикув фабрикаси ҳам бор. Интервьюлардан бирида Юлдуз Усмонова фабрикадан катта даромад олмаса-да, ёпа олмаслиги ҳақида айтиб ўтганди.
Изоҳ (0)