Ijtimoiy tarmoqlarda bir fuqaro ichki ishlar organlari xodimlarining qonuniy talablarini bajarmasdan, jamoat tartibini buzib shovqin ko‘tarayotganligi aks etgan video tarqaldi. Ushbu videoga sharhda esa go‘yoki Toshkent shahar hokimi qabuliga kelgan fuqaroni qabulga qo‘yishmayotgani haqida ma’lumot berilgan. Toshkent shahar IIBB videodagi holatga munosabat bildirdi.
Ma’lum qilinishicha, 10-aprel kuni soat 19:00 larda Chilonzor tumanidagi “Dilobod” mahallasida 26 yoshli T.G. bir nechta fuqaro bilan og‘zaki janjallashib, jamoat tartibini buzgan. So‘ng voqea joyiga yetib kelgan ichki ishlar organlari xodimlarining jamoat tartibini saqlash haqidagi qonuniy talabini bajarmasdan, ommani o‘ziga qaratish maqsadida baqir-chaqir qilib, IIO xodimlaridan qochishga harakat qilgan.
Ushbu fuqaroga nisbatan Ma’muriy javobgarlik to‘g‘risidagi kodeksining 183-moddasi (mayda bezorilik) hamda 194-moddasi (ichki ishlar organlari xodimining qonuniy talablarini bajarmaslik) alomatlari bilan ma’muriy bayonnoma rasmiylashtirilib, o‘rnatilgan tartibda ko‘rib chiqishlik uchun sudga taqdim etilgan.
“Hurmatli fuqarolar, sodir bo‘layotgan voqeani, uning sabablarini to‘liq bilmasdan turib videolarga o‘zboshimchalik bilan sharh bermasligingizni so‘raymiz. Unutmang, yolg‘on axborot tarqatganlik uchun javobgarlik mavjud”, — deyiladi munosabatda.
Avvalroq Farg‘onada IIB xodimlarini haqorat qilib, tan jarohati yetkazgan mast haydovchiga jinoyat ishi qo‘zg‘atilgani, Samarqandda IIB xodimlarining qonuniy faoliyatiga qarshilik ko‘rsatgan 16 nafar sportchi qamoqqa olingani to‘g‘risida xabar berilgandi.
Izoh (0)