Ўзбекистон бўйлаб 5 босқичли оммавий спорт мусобақалари ўтказилади

«Маҳаллаларда ёшларни оммавий спортга жалб қилишни янги босқичга олиб чиқиш чора-тадбирлари тўғрисида»ги президенти қарори қабул қилинди, деб хабар беради ЎзА.

Оммавий спортни ривожлантиришнинг асосий йўналишлари этиб маҳаллаларда ёшларнинг оммавий спорт билан шуғулланишлари учун моддий-техник базани мустаҳкамлаш ва спорт иншоотларини замонавий спорт жиҳозлари билан таъминлаш, шунингдек, имконияти чекланган ёшлар учун тегишли спорт инфратузилмасини яратиш белгиланган.

Шунингдек, 2022 йилдан ҳар йили 30 июнь – Ўзбекистон ёшлари куни ҳамда декабрда ўтказиладиган «Ёшлар форуми» доирасида футбол, мини-футбол, волейбол, енгил атлетика, шахмат, шашка, стол тенниси, стритбол, воркаут турлари бўйича 5 босқичли оммавий спорт мусобақалари ўтказилади:

• биринчи босқичда – кўчалараро маҳалла мусобақалари;
• иккинчи босқичда – маҳаллалараро сектор мусобақалари;
• учинчи босқичда – сектор мусобақаларида ғолиб бўлган маҳалла жамоалари ўртасида туман (шаҳар) мусобақалари;
• тўртинчи босқичда – туман (шаҳар) мусобақалари ғолиб маҳалла жамоалари ўртасида вилоят мусобақалари;
• бешинчи босқичда – вилоят мусобақаларида ғолиб бўлган маҳалла жамоалари ўртасида республика (финал) мусобақалари.

Бундан ташқари, 2023 йил 1 мартдан бошлаб олимпия, ноолимпия ва миллий спорт турлари бўйича уч босқичли умумреспублика спорт мусобақаларини ўтказиш тизими жорий қилинади.

Қарор билан Спортни ривожлантириш вазирлигига спорт федерация (ассоциация)лари билан биргаликда икки ой муддатда:

• маҳаллаларда оммавий спорт мусобақаларини ташкил этиш ва ўтказиш бўйича ҳар бир масъулнинг иш фаолиятини тўлиқ баҳолашга қаратилган рейтинг тизимини жорий этиш;
• ёшлар ўртасида оммавий спорт мусобақаларини оммалаштириш ва уларнинг қизиқишларини кучайтириш мақсадида тажрибали ва таниқли спортчилар иштирокида мотивацион учрашувлар ташкил этиш тизимини йўлга қўйиш;
• Ёшлар ишлари агентлиги билан биргаликда 2022 йил якунига қадар 6 миллион нафар ёшларнинг оммавий спорт тадбирлари билан қамраб олинишини таъминлаш вазифалари қўйилган.