Ўзбекистонда Рамазон ойининг илк ҳафтасида амалга оширилган хайриялар тўғрисида маълумот берилди

Ўзбекистонда Рамазон ойининг илк ҳафтасида уч мингга яқин хонадонларга 473,93 миллион сўмлик озиқ-овқат маҳсулотлари тарқатилди. Бу ҳақда Ўзбекистон мусулмонлари идораси масъул ходими Неъмат Мусаев АОКАда ўтказилган брифингда маълум қилди.

Брифингда «Вақф» хайрия жамоат фонди томонидан Рамазон ойининг илк ҳафтасида амалга оширилган хайриялар ҳақида ахборот берилган. Маълумотларга кўра, ўтган бир ҳафта ичида моддий кўмакка муҳтож 149 нафар шахсга 128 миллион сўмлик пул маблағлари етказилган. Шунингдек:

• Фарғона вилоятида яшовчи жазони ижро этиш муассасасидан озод этилган 15 нафар фуқарога хайрия тадбири учун 4,6 миллион сўм;
• Ислом цивилизацияси маркази ташаббуси билан ўтказилган «Китоб – камолот калити» кўргазмаси иштирокчиларини рағбатлантириш учун 4 миллион сўм маблағ ажратилиб, ҳақдорларга етказилган.

Маълумот учун, Ўзбекистон президентининг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги фармонига мувофиқ Ўзбекистон мусулмонлари идораси ҳузурида «Вақф» хайрия жамоат фонди ташкил этилган. «Вақф» хайрия жамоат фондининг асосий вазифалари фуқароларнинг диний, маънавий ва интеллектуал салоҳиятини оширишга қаратилган ташаббусларини қўллаб-қувватлаш, миллий ва диний қадриятларимизни асраб-авайлаш, масжидлар ва диний таълим муассасаларининг биноларини қуриш, таъмирлаш, реконструкция қилиш, ободонлаштириш, моддий-техник базасини мустаҳкамлашдан иборат.