“Vaqf” fondi 2021-yilda qariyb 70 mlrd so‘m xayriya qildi

AOKAda o‘tkazilgan brifingda “Vaqf” fondi axborot xizmati rahbari Saidabror Umarov fondning 2021-yildagi faoliyatiga oid ma’lumotlarni ochiqladi. Bu haqda “Rasmiy xabarlar” xabar qilmoqda.

Qayd etilishicha, o‘tgan yilda fond tomonidan xayriya, zakot, vaqf mulklari, ziyoratgohlar, diniy tashkilotlar va aksiyalar orqali kelib tushgan mablag‘lar hamda homiylar va hamkor tashkilotlar tomonidan taqdim etilgan moddiy ko‘rinishdagi ehsonlar bilan qo‘shib hisoblaganda jami 69 milliard 22 ming 690 so‘mdan ziyod mablag‘ xayriya sifatida sarflangan. Shu jumladan:

• diniy ta’lim muassasalari, ilmiy-tadqiqot markazlari faoliyatini moliyalashtirish uchun – 1 milliard 120 million 601 ming500 so‘m;
• diniy ta’lim muassasalari professor-o‘qituvchilari, o‘quvchi-talabalarini moddiy va ijtimoiy qo‘llab-quvvatlash uchun – 5 milliard 573 million 46 ming 366 so‘m;
• diniy ta’lim muassasalari o‘quvchi-talabalar to‘lov shartnomasi uchun –840 million so‘m;
• ijtimoiy himoyaga muhtoj oilalar talaba farzandlarini qo‘llab-quvvatlash uchun – 15 million 450 ming so‘m;
• masjidlar qurilishi uchun – 932 million 920 ming 454 so‘m;
• masjidlar va ziyoratgohlar xodimlarini moddiy va ijtimoiy qo‘llab-quvvatlash uchun – 36 milliard 798 million 386 ming 10 so‘m;
• uylari yong‘indan talafot ko‘rgan fuqarolarga moddiy yordam uchun – 90 million so‘m;
• nochor, ko‘makka muhtoj fuqarolarga turli moddiy ko‘rinishda berilgan yordamlar uchun – 6 milliard 818 million 35 ming 811 so‘m;
• aholining ijtimoiy himoyaga muhtoj qatlamlari, shu jumladan imkoniyati cheklangan, nogironligi bor bo‘lgan shaxslarni moddiy qo‘llab-quvvatlash uchun – 3 milliard 600 million 531 ming so‘m;
• turli xayriya tadbirlari uchun – 1 milliard 736 million 459 ming 260 so‘m;
• viloyat vakilliklarining ma’muriy xarajatlari uchun berilgan moddiy yordam – 1 milliard 116 million 680 ming so‘m;
• aholi uchun toza ichimlik suvi chiqarishga – 290 million 580 ming so‘m;
• O‘zbekiston musulmonlari idorasi kutubxonasi moddiy texnik bazasini boyitish uchun – 90 million so‘m;
• diniy soha xodimlari va diniy ta’lim muassasa ustoz-murabbiylari, talabalari va texnik xodimlarini pandemiya davrida moddiy qo‘llab quvvatlash uchun – 10 milliard so‘m mablag‘ faqatgina xayriya ishlari uchun sarflangan.

2021-yilda joriy etilgan yangi “Vaqf ko‘magi” loyihasi doirasida 4 ta viloyatning qandolatchilik, tikuvchilik va hunarmandlik kasbiga ega ijtimoiy ko‘makka muhtoj oilalarning 103 nafariga kerakli asbob-anjomlar xayriya qilinib, ish bilan ta’minlangan.