Komil Allamjonov Uzmetronom sayti asoschisi Sergey Yejkov ustidan arz qildi

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov “Uzmetronom.com” sayti asoschisi Sergey Yejkov ustidan huquqni muhofaza qiluvchi organlarga arz qildi. Bu haqda u o‘zining Telegram’dagi kanali orqali ma’lum qilgan.

Allamjonovning so‘zlariga ko‘ra, 2022-yilning 21-fevral kuni Sergey Yejkov o‘zining “Uzmetronom.com” saytida “Brilliantoviy malchik” sarlavhasi ostida maqola e’lon qilgan. Unda Komil Allamjonov 4,2 million dollarlik tilla taqinchoqlarni O‘zbekistonga noqonuniy olib kirishda sherikchilikda ayblagan. “Bu juda jiddiy ayblov — bu Jinoyat kodeksining 182-moddasi ‘bojxona to‘g‘risidagi qonunlarni buzish’ og‘ir jinoyatini sodir etish. Vaholanki, bu g‘irt tuhmat va to‘qima ertakning o‘zginasi”, — deydi u.

Yejkov bilan shaxsan tanish emasman, lekin 2016-yilga qadar odamlar orasida u go‘yoki ayrim maxsus xizmatlarning buyurtmalarini bajarib kelgan, ma’lum shaxslarning obro‘siga putur yetkazish quroli sifatida ishlatib kelingan, degan gaplar yuradi. Bu gap-so‘zlarning rost yoki yolg‘onligini bilmayman, bu safar ham buyurtma bor yoki yo‘q ekanini endi tergov aniqlaydi.

Tahlil qilib ko‘rsam, 2009-yildan shu kungacha ushbu saytda “Allamjonov” mavzusi bo‘yicha 30 dan ortiq tanqidiy material e’lon qilingan. Shu paytgacha indamadim. Chunki men hamisha so‘z erkinligi va matbuot erkinligi tarafdori bo‘lganman, bu yo‘lda kurashganman, haliyam kurashyapman. Biroq har bitta tanqid faktlarga asoslangan bo‘lishi kerak.

Shu paytga qadar 30 ta maqolaga indamadim, lekin oxirgisi o‘tib tushdi. Endi oshirib yubordi. Gap mening obro‘m va reputatsiyam haqida ketar ekan, men jim qarab tura olmayman. Bu — so‘z erkinligi ham, jurnalistika ham emas. Bu matbuot nomli instrumentdan jirkanch maqsadlar yo‘lida foydalanish hisoblanadi. Biz bunday so‘z erkinligiga qarshimiz. Shuning uchun men, advokat bilan maslahatlashgan holda, o‘z haq-huquqimni himoya qilish maqsadida Sergey Yejkov ustidan arz qilib, huquqni muhofaza qiluvchi organlarga murojaat qildim. Huquqshunoslarning ta’kidlashicha, agar Yejkov o‘z maqolasida ko‘rsatgan holat bo‘yicha dalil-isbot keltira olmasa, unga nisbatan Jinoyat kodeksining 139-moddasi, 3-qismi “a” bandi (og‘ir yoki o‘ta og‘ir jinoyat sodir etishda ayblab tuhmat qilish) bilan jinoiy ish qo‘zg‘atilishi mumkin va u qonun oldida javob berishi lozim bo‘ladi.

Hammasini qonun va sud hal qilishi kerak. Men barcha kerakli ma’lumotlarni taqdim etishga tayyorman.

Komil Allamjonov, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi