Kamal Tarixov Qoraqalpog‘iston sudi raisi etib saylandi

Kamal Tarixov Qoraqalpog‘iston sudi raisi lavozimiga saylandi. Bu haqda Jo‘qorg‘i Kenges matbuot xizmatiga tayanib, “Gazeta.uz” xabar berdi.

Qoraqalpog‘iston Respublikasi Jo‘qorg‘i Kengesining navbatdagi yig‘ilishida Qoraqalpog‘iston sudining raisini saylash masalasi ko‘rib chiqilgan. Sudyalar oliy kengashining O‘zbekiston prezidenti bilan kelishilgan xulosasi asosida Jo‘qorg‘i Kenges raisining taklifiga binoan deputatlar Qoraqalpog‘iston Respublikasi sudi raisi lavozimiga Kamal Tarixov nomzodini ma’qullagan.

Yakunda uni mazkur lavozimga tayinlash va 2021-yilning fevralida sud raisi etib saylangan Gulnara Bazarbayevani vazifasidan ozod etish to‘g‘risida qaror qabul qilingan.

Kamal Tarixov bunga qadar Qoraqalpog‘iston sudi raisining fuqarolik ishlari bo‘yicha o‘rinbosari lavozimida faoliyat ko‘rsatgan.

Avvalroq Navoiyda odil sudlovni amalga oshirishda qonuniylikni buzgan sudya ishdan olingani, mas’uliyatsizlikka yo‘l qo‘ygan yana 8 nafar sudya jazolangani, Toshkent viloyatida qasamyodini buzgan sudya lavozimidan ozod etilgani to‘g‘risida xabar berilgandi.