Buxoro hokimi yer bilan bog‘liq qonunbuzilishlar haqida xabar bergan shaxslarni rag‘batlantirishini bildirdi

Buxoro viloyati hokimi Botir Zaripov yer uchastkalarini o‘zboshimchalik bilan egallash hamda ulardan noqonuniy foydalanish holatlari bo‘yicha xabar bergan jamoatchilik subyektlarini pul mukofoti bilan rag‘batlantirishini ma’lum qildi, deya xabar berdi “Daryo” muxbiri.

“Majburiy ijro byurosining hududiy bo‘limlari ish yurituvida bo‘lgan shu 659 ta noqonuniy qurilmalarni bartaraf etish bilan  bog‘liq murojaatlar ish yuritishdan tamomlangan bo‘lsa ham ijro hujjatlarining amalda ijrosi ta’minlanmasdan qolgan. Shuningdek, yirik kommunikatsiya tarmoqlari atrofida hamda boshqa muhofaza zonalarida yuridik va jismoniy shaxslar tomonidan jami 1285 ta noqonuniy bino-inshoot qurilgani aniqlangan edi. Ushbu masalalarni ham to‘liq bartaraf etish choralari haligacha ko‘rilmagan”, — degan Botir Zaripov.

Viloyatda 2021-yil davomida yer munosabatlari bilan bog‘liq qonunbuzilishlari bo‘yicha 37 ta jinoyat ishi qo‘zg‘atilgan. Biroq, hududlarda yer uchastkalaridan maqsadsiz va samarasiz foydalanish, noqonuniy qurilmalar qurish va ularni o‘zboshimchalik bilan egallash holatlariga to‘liq barham berilmagan. Shu bois, bunday noqonuniy xatti-harakatlarning oldini olish maqsadida viloyat ishchi guruhi tuzilib, ular zimmasiga sud qarorlari asosida yer uchastkalarida hamda kommunikatsiya tarmoqlari muhofaza zonalaridagi noqonuniy qurilmalarni bartaraf etish yuklangan.

“Hududda noqonuniy qurilma va yerlarni o‘zboshimchalik bilan egallab olish holatlari ixtiyoriy bartaraf etilmagan taqdirda ularni majburiy tartibda bartaraf etish bo‘yicha sudlarga murojaat qilinishini tashkil etish kuchaytirilishi zarur. Sud qarorlari asosida noqonuniy qurilma va o‘zboshimchalik bilan egallab olingan muammolarni bartaraf etish to‘g‘risidagi ijro hujjatlarini asossiz ravishda ijrosiz qaytargan, fuqaroni chaqirib olib, ijro harakatlarini har qanday ko‘rinishda to‘xtatish choralarini ko‘rishga harakat qilgan mansabdorlarning javobgarligi oshiriladi”, — dedi viloyat hokimi.

Ma’lum bo‘lishicha, yer to‘g‘risidagi qonunbuzilishlarning oldini olish va ularni aniqlashda faollik ko‘rsatgan shaxslarning moddiy rag‘batlantirilishi xususida viloyat rahbari farmoyish ham e’lon qilgan.

“Bunday muammolarni bartaraf etishda jamoatchilikka suyanamiz. Shu nuqtayi nazardan, yer uchastkalarini o‘zboshimchalik bilan egallash va noqonuniy foydalanish holatlari bo‘yicha rasm va video qayd etish texnika vositalari orqali tasdiqlangan xabarlar uchun  jamoatchilik nazorati subyektlariga Yer kodeksining 84-moddasida nazarda tutilgan tartibda pul mukofoti berilsin, shuningdek, bu borada ijobiy natija ko‘rsatgan xodimlar ham mehnat qonunchiligiga ko‘ra, rag‘batlantirilsin”, — deyiladi mazkur farmoyishda.

“Daryo” muxbirining aniqlik kiritishicha, jamoatchilik subyektlari tomonidan ko‘plab rasm va videoxabarlar kelib tushgan. Ayni paytda ularning haqqoniyligini o‘rganish borasida viloyat ishchi guruhi tomonidan ishlar boshlab yuborilgan.