“Jizzax viloyatida futbolni yanada rivojlantirish va ommalashtirishning qo‘shimcha chora-tadbirlari to‘g‘risida”gi Vazirlar Mahkamasining qarori qabul qilindi.
Hujjat bilan “So‘g‘diyona” va “So‘g‘diyona Vumen” professional futbol klublari huzuridagi Futbol akademiyasini tashkil etish ma’qullangan. Akademiya faoliyatini 2022/2023-o‘quv yilidan boshlab tashkil qiladi va o‘quv jarayoni unga eng yaqin masofada joylashgan umumiy o‘rta ta’lim muassasalarida amalga oshiriladi.
Akademiyaning asosiy vazifalari:
- Yosh istiqbolli sportchilarni tanlab olish va tarbiyalash masalalari bo‘yicha bolalar-o‘smirlar sport maktablari, futbol mahorat maktablari, ixtisoslashtirilgan olimpiya zaxiralari maktab-internatlari bilan uzluksiz hamkorlikni amalga oshirish, ularga o‘quv-uslubiy va me’yoriy-axborot yordami ko‘rsatishni ta’minlash;
- Zarur sport anjonlari va uskunalari bilan jihozlangan o‘quv-mashg‘ulot bazalarini yaratish hamda futbol bo‘yicha resupublika va xalqaro musobaqalarda g‘oliblikni qo‘lga kiritishga qodir bo‘lgan sportchilarni tayyorlashda ushbu bazalardan samarali foydalanish;
- Akademiya bazasida milliy terma jamoalar va ularning zaxiralari ishtirokida o‘quv-mashq yig‘inlari, respublika va mintaqaviy sport bellashuvlarini tashkil etish hamda muntazam ravishda o‘tkazib borish;
- O‘quvchi-futbolchilar va trenerlar tarkibining professional mahoratini oshirish uchun Yevropa futbol jamoalari, futbol maktablari, akademiyalari va klublari bilan tajriba almashish bo‘yicha hamkorlikni rivojlantirish;
- Xalqaro futbol federatsiyasi trenerlarini o‘qitish dasturlaridan foydalangan holda futbol bo‘yicha akademiya trenerlari malakasini tizimli asosda oshirishni ta’minlash va hokazo.
Akademiyada o‘qish muddati 7 yilni tashkil etadi, o‘qish yakunlanganidan so‘ng ularga tegishli sertifikat beriladi va avvalambor olimpiya va paralimpiya zaxirasi kollejlarida keyingi maxsus, kasb-hunar ta’limi berilishi bilan ta’minlanadi.
Mavzuga doir: O‘zbekistonda “Roma” akademiyasi ochilishi mumkin
Izoh (0)