АҚШ Россия биологик ёки кимёвий қурол қўллаши мумкинлиги сабаб Украинага аслаҳа-анжомларни етказиб бермоқда. Бу ҳақда Оқ уй расмий вакили Жен Псаки маълум қилди.
«Украиналик шерикларимизга ёрдам бериш учун АҚШ ҳукумати Украина ҳукуматига ҳимоя воситалари ва асбоб-анжомларни тақдим этмоқда», — дейди Псаки.
Германия канцлери Олаф Шольц Россия Украинада биологик ёки кимёвий қуролларни ишлаца, «драматик чоралар» ҳақида огоҳлантирган эди.
6 март куни Россия Мудофаа вазирлиги Украинада биологик қурол компонентлари яратилаётгани айтилган ҳужжатларни эълон қилганди. Идора расмий вакили генерал майор Игорь Конашенковнинг сўзларига кўра, шундан сўнг «Украина Соғлиқни сақлаш вазирлиги барча биолабораторияларга хавфли патогенлар сақланадиган захираларини зудлик билан йўқ қилиш бўйича кўрсатма юборган».
16 март куни Россия президенти Владимир Путин Украинада бевосита Россия чегараси яқинида биологик қурол компонентлари яратилганини маълум қилди. Унинг сўзларига кўра, Пентагон раҳбарлиги ва молиявий кўмагида ўнлаб лабораториялар тармоғи «ҳарбий-биологик дастурлар, жумладан, коронавирус, Сибир куйдиргиси, Африка чўчқа ўлати ва бошқа ҳалокатли касалликлар намуналари билан тажрибалар ўтказган».
АҚШ давлат котиби ўринбосари Виктория Нуланд Сенатдаги эшитувда Украинада биологик тадқиқот объектлари бўлганини тасдиқлаган. У мазкур тадқиқотлар ҳақида ҳеч қандай батафсил маълумотларни келтирмаган. Пентагон ва Оқ уй эса бу маълумотларни рад этган. БМТ Украинада ишлаган ЖССТ ходимларининг бундай тадқиқотлардан хабари йўқлигини маълум қилган.
Изоҳ (0)