Markaziy bank xorijiy valyutalarning o‘zbek so‘miga nisbatan 1-aprelda amalda bo‘ladigan qiymatini belgiladi.
Unga ko‘ra, rublning so‘mga nisbatan qiymati urushdan avvalgi qiymatiga to‘liq qaytdi.
24-fevral kuni Rossiya Ukrainada harbiy operatsiyani boshlagan edi. Ayni o‘sha paytda rublning so‘mga nisbatan qiymati 136,41 so‘m edi.
1-aprel holatiga ko‘ra O‘zbekistonda 1 rubl 139,18 so‘m bo‘lmoqda. Taqqoslash uchun 9-mart kuni, rubl 80 so‘mga baholanayotgan edi.
4-mart kuni O‘zbekistonda jismoniy shaxslar 86,5 mln rubllik Rossiya valyutasini xarid qilgan edi. O‘sha vaqtda rublning so‘mga nisbatan qiymati 93,04 so‘m edi.
3-mart kuni esa Markaziy bank rubl qadrsizlanayotgani tufayli zaruriy choralar ko‘rishni boshlagan edi. Unga ko‘ra O‘zbekistondagi barcha banklarda rubldagi pul o‘tkazmalari bo‘yicha ayirboshlash operatsiyalarini uzluksiz amalga oshirish belgilangan edi. Bundan tashqari Rossiya rublini sotish va sotib olish kurslarini joriy xalqaro kotirovkalarga asosan kun davomida o‘zgartirib borish tavsiya qilingandi.
Rubl mustahkamlanishing asosiy sabablari:
- Rossiya prezidenti Vladimir Putinning sanksiya qo‘llagan mamlakatlarga gazni rublda sotish haqidagi qarori;
- Rossiya Markaziy bankining valyuta cheklovlari (erkin sotib olish va sotishni taqiqlash, rublda xorijiy valyuta depozitlarini chiqarish va boshqalar);
- Valyuta tushumining 80 foizini sotish bo‘yicha talablar kiritilishi va boshqalar.
Avvalroq O‘zbekistonda bir necha kundan buyon rubl kursi ko‘tarilayotgani sabablari ma’lum qilingan edi.
Izoh (0)