Ўзбекистонлик икки нафар боксчи 7 май куни Лас-Вегасда (АҚШ) профессионал рингда ўзининг навбатдаги жангини ўтказади. Бу ҳақда World of Boxing промоутерлик компанияси маълум қилди.
Супер енгил вазн тоифасида ҳаракат қилаётган Шаҳрам Ғиёсов (12-0, 9 КО) ва енгил вазн дивизиони вакили Элнур Абдураимов (8-0, 7 КО) май ойининг марказий бокс оқшомида рингга чиқади. Ҳозирча ўзбекистонлик боксчиларга кимлар рақиб бўлиши номаълум.
Мазкур бокс кечасининг асосий жангида супер ўрта вазн тоифаси мутлақ чемпиони Сауль Альварес (57-1-2, 39 КО) россиялик енгилмас чарм қўлқоп устаси Дмитрий Биволга (19-0, 11 КО) қарши жанг қилади. Жанг ярим оғир вазн тоифасида ўтказилади.
Профессионал боксда мағлубиятсиз одимлаётган Ғиёсов WBA International камарига эгалик қилади. Шаҳрам WBA рейтингида еттинчи, IBF рейтингида эса 11-поғонани эгаллаб турибди. У сўнгги жангини 2021 йилнинг декабрь ойида Тошкентда ўтказиб, Кристиан Кориа устидан ғалабага эришганди.
Абдураимов ҳам охирги жангини декабрь ойида Тошкентда ўтган бокс кечасида ўтказиб, унда филиппинлик Жон Геминони таслим этган.
Изоҳ (0)