O‘zbekiston 2030-yilning oxirigacha tabiiy gaz qazib chiqarishni 20 foizdan ko‘proqqa oshirishni rejalashtirmoqda. Biroq Yevropa gaz yetkazib berishni talab qilayotgan bir paytda mamlakat gazning asosiy qismini o‘zida saqlamoqda. Bu haqda Bloomberg xabar berdi.
“Gaz qazib olish hajmi o‘tgan yilgi 53,6 mlrd kub metrdan 2030-yilda 66,1 mlrd kub metrga ko‘tariladi”, — dedi energetika vazirining birinchi o‘rinbosari Azim Ahmadxo‘jayev.
Sobiq Ittifoqdagi yetakchi uchta ishlab chiqaruvchidan biri va avvallari Xitoy, Rossiya va uning bir qancha qo‘shnilariga asosiy gaz yetkazib beruvchi bo‘lgan O‘zbekiston bu yil mahalliy iste’molning o‘sishi fonida eksportini kamaytirdi.
Biz ichki iste’mol talabini qondirish va tabiiy gazni xomashyo sifatida qayta ishlashni ustuvor yo‘lga qo‘yamiz. O‘zbekiston uchun gazni eksport qilmasdan, undan qo‘shimcha qiymatga ega mahsulot ishlab chiqarish ancha foydali, bu esa o‘z navbatida importni kamaytiradi, — dedi Ahmadxo‘jayev.Rossiyaning Ukrainadagi harbiy harakatlari bozorni tang ahvolga solib qo‘yishi mumkin. Bundan qo‘rqib gaz narxining ko‘tarilishi bilan kurashayotgan Yevropa butun dunyo bo‘ylab eksportyorlar bilan gazni ko‘proq yetkazib berish imkoniyatlarini ko‘rib chiqmoqda.
Ozarbayjon va Jazoir bunga yordam berishga tayyor ekanliklarini bildirishgan, biroq ularning eksportining aksariyat qismi allaqachon xaridorlar bilan uzoq muddatli shartnomalarga ega.
Ahmadxo‘jayevning so‘zlariga ko‘ra, 2022-yilda O‘zbekistonda gaz qazib olish hajmi 56,3 mlrd kub metrga yetishi kutilmoqda.
Maishiy iste’mol o‘tgan davrda 11 foizga o‘sib, 47,2 mlrd kub metr, 2030-yilda esa 56 mlrd kub metrdan oshadi. Shuningdek, mamlakat mahalliy bozorga suyultirilgan gaz yetkazib berishni ham oshirishni rejalashtirmoqda.
Gazni qayta ishlash
O‘zbekiston qo‘shimcha gaz ishlab chiqarishning bir qismini boshqa mahsulotlar qatorida plastmassa va mineral o‘g‘itlar ishlab chiqarishga sarflashni rejalashtirmoqda.
Dekabr oyida O‘zbekiston o‘zining birinchi gazdan suyuqlikka aylantiruvchi zavodini ishga tushirdi.
Bu 3,6 mlrd dollarlik sintetik suyuq yoqilg‘i va neft ishlab chiqarish loyihasi hisoblanadi. Shuningdek, O‘zbekiston polietilen va polipropilen ishlab chiqaradigan Sho‘rtan gazni qayta ishlash zavodini kengaytirmoqda va qiymati 2,5 mlrd dollarlik gaz-kimyo majmuasini qurmoqda.
Neft-kimyo sanoati uchun gazni tejashga ko‘maklashish maqsadida O‘zbekiston 2030-yilgacha elektr energiyasining 30 foizini toza energiya manbalaridan ishlab chiqarishni maqsad qilib qo‘ygan.
Jahon banki va boshqa kreditorlar ko‘magida hukumat 5,5 gigavattlik shamol va quyosh energiyasi loyihalarini tashkil etish bo‘yicha tenderlar o‘tkazmoqda.
Davlat asosiy gaz va neft ishlab chiqaruvchisi bo‘lgan “O‘zbekneftgaz” AJdagi ulushlarining bir qismini sotishni rejalashtirayotganini ma’lum qildi.
Rothschild & Cie kompaniyasi 2024-yilga borib mahalliy va xalqaro bozorlarda birlamchi ommaviy joylashtirishga tayyorgarlik ko‘rish uchun moliyaviy maslahatchi sifatida yollangan.
Avvalroq yil yakuniga qadar 1,095 mlrd kub metr tabiiy gaz qazib olish rejalashtirilgani haqida xabar berilgan edi.
Izoh (0)