Ўзбекистон 2030 йилнинг охиригача табиий газ қазиб чиқаришни 20 фоиздан кўпроққа оширишни режалаштирмоқда. Бироқ Европа газ етказиб беришни талаб қилаётган бир пайтда мамлакат газнинг асосий қисмини ўзида сақламоқда. Бу ҳақда Bloomberg хабар берди.
«Газ қазиб олиш ҳажми ўтган йилги 53,6 млрд куб метрдан 2030 йилда 66,1 млрд куб метрга кўтарилади», — деди энергетика вазирининг биринчи ўринбосари Азим Аҳмадхўжаев.
Собиқ Иттифоқдаги етакчи учта ишлаб чиқарувчидан бири ва авваллари Хитой, Россия ва унинг бир қанча қўшниларига асосий газ етказиб берувчи бўлган Ўзбекистон бу йил маҳаллий истеъмолнинг ўсиши фонида экспортини камайтирди.
Биз ички истеъмол талабини қондириш ва табиий газни хом ашё сифатида қайта ишлашни устувор йўлга қўямиз. Ўзбекистон учун газни экспорт қилмасдан, ундан қўшимча қийматга эга маҳсулот ишлаб чиқариш анча фойдали, бу эса ўз навбатида импортни камайтиради, — деди Аҳмадхўжаев.Россиянинг Украинадаги ҳарбий ҳаракатлари бозорни танг аҳволга солиб қўйиши мумкин. Бундан қўрқиб газ нархининг кўтарилиши билан курашаётган Европа бутун дунё бўйлаб экспортёрлар билан газни кўпроқ етказиб бериш имкониятларини кўриб чиқмоқда.
Озарбайжон ва Жазоир бунга ёрдам беришга тайёр эканликларини билдиришган, бироқ уларнинг экспортининг аксарият қисми аллақачон харидорлар билан узоқ муддатли шартномаларга эга.
Аҳмадхўжаевнинг сўзларига кўра, 2022 йилда Ўзбекистонда газ қазиб олиш ҳажми 56,3 млрд куб метрга етиши кутилмоқда.
Маиший истеъмол ўтган даврда 11 фоизга ўсиб, 47,2 млрд куб метр, 2030 йилда эса 56 млрд куб метрдан ошади. Шунингдек, мамлакат маҳаллий бозорга суюлтирилган газ етказиб беришни ҳам оширишни режалаштирмоқда.
Газни қайта ишлаш
Ўзбекистон қўшимча газ ишлаб чиқаришнинг бир қисмини бошқа маҳсулотлар қаторида пластмасса ва минерал ўғитлар ишлаб чиқаришга сарфлашни режалаштирмоқда.
Декабрь ойида Ўзбекистон ўзининг биринчи газдан суюқликка айлантирувчи заводини ишга туширди.
Бу 3,6 млрд долларлик синтетик суюқ ёқилғи ва нефть ишлаб чиқариш лойиҳаси ҳисобланади. Шунингдек, Ўзбекистон полиэтилен ва полипропилен ишлаб чиқарадиган Шўртан газни қайта ишлаш заводини кенгайтирмоқда ва қиймати 2,5 млрд долларлик газ-кимё мажмуасини қурмоқда.
Нефть-кимё саноати учун газни тежашга кўмаклашиш мақсадида Ўзбекистон 2030 йилгача электр энергиясининг 30 фоизини тоза энергия манбаларидан ишлаб чиқаришни мақсад қилиб қўйган.
Жаҳон банки ва бошқа кредиторлар кўмагида ҳукумат 5,5 гигаваттлик шамол ва қуёш энергияси лойиҳаларини ташкил этиш бўйича тендерлар ўтказмоқда.
Давлат асосий газ ва нефть ишлаб чиқарувчиси бўлган «Ўзбекнефтгаз» АЖдаги улушларининг бир қисмини сотишни режалаштираётганини маълум қилди.
Rothschild & Cie компанияси 2024 йилга бориб маҳаллий ва халқаро бозорларда бирламчи оммавий жойлаштиришга тайёргарлик кўриш учун молиявий маслаҳатчи сифатида ёлланган.
Аввалроқ йил якунига қадар 1,095 млрд куб метр табиий газ қазиб олиш режалаштирилгани ҳақида хабар берилган эди.
Изоҳ (0)