Yaponiya hukumati COVID-19 ga qarshi davom etayotgan kurash doirasida 25-mart kuni O‘zbekistonga 200 ming dozadan ortiq AstraZeneca vaksinasini taqdim etdi. Vaksinalarni yetkazib berish COVAX mexanizmi orqali UNICEF bilan hamkorlikda amalga oshirilgan.
“Yaponiya O‘zbekistonning COVID-19 ga qarshi kurashdagi sa’y-harakatlarini, jumladan, zamonaviy tibbiy uskunalar va shaxsiy himoya vositalari bilan ta’minlash hamda aholining ijtimoiy-iqtisodiy jihatdan zaif qatlamlariga yordamini doimo qo‘llab-quvvatlab keladi. Hozirgacha biz O‘zbekistonda COVID-19 ga qarshi kurashish uchun jami 10 million dollardan ortiq mablag‘ ajratdik. Bugun Yaponiya O‘zbekiston xalqi uchun qimmatli vaksinalarni yetkazib beruvchi davlatlar guruhiga qo‘shilganini e’lon qilishdan juda mamnunman”, — deydi Yaponiyaning O‘zbekistondagi elchisi Yoshinori Fujiyama.
U, shuningdek, ushbu yordam O‘zbekistonda xalqining sog‘lom turmush tarziga ko‘mak berishiga hamda diplomatik munosabatlar o‘rnatilganining 30 yilligini nishonlaydigan ikki davlat o‘rtasidagi do‘stlikni yanada mustahkamlashga xizmat qiladi deb umid bildirgan.
Yaponiya hukumatining ko‘magi vaksina yetkazib berish va tarqatish bo‘yicha global mexanizm doirasida amalga oshirilmoqda. Ushbu vaksinalar hozirgi vaqtdagi ta’minot taqchilligini yumshatish va, eng muhimi, kasallikning yangi variantlaridan himoya qilish va maqsadli guruhlarga emlashni kengaytirishda muhim ahamiyat kasb etadi.
Ta’kidlanishicha, Yaponiya taqdim etgan vaksinalar bilan birgalikda O‘zbekiston tomonidan olingan COVID-19 vaksinalarining umumiy soni 61 million dozaga yetgan. Bundan tashqari, UNICEF shprislar, xavfsizlik qutilari va shaxsiy himoya vositalari kabi xavfsiz emlash vositalarini xarid qilgan va yetkazib bergan.
COVAX mexanizmi doirasida, UNICEF 2022-yil o‘rtasiga qadar COVID-19 ga qarshi yana 24,6 million doza vaksina yetkazib berishni rejalashtirgan.
Eslatib o‘tamiz, O‘zbekistonga 2022-yilning fevralida Moderna vaksinasining 2,8 milliondan ortiq dozasi, mart o‘rtalarida 2 million dozaga yaqin Pfizer vaksinasi, 17-mart kuni esa Yaponiyadan 201 600 doza AstraZeneca vaksinasi olib kelingandi.
Izoh (0)