Shavkat Mirziyoyev “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun imzoladi, deb xabar beradi Norma.
“O‘zbekiston Respublikasining referendumi to‘g‘risida”, “O‘zbekiston Respublikasining Davlat gerbi to‘g‘risida”gi qonunlariga, Jinoyat kodeksining 227-moddasi 2-qismi “a” bandiga, Jinoyat-protsessual kodeksning 429-moddasi 2-qismiga hamda boshqa ayrim qonun hujjatlariga kiritilgan o‘zgartirish va qo‘shimchalarga ko‘ra, endilikda, pasportlar bilan birga ID-kartalar ham qabul qilinadi.
Shuningdek, Oila kodeksiga doimiy yashab turgan joyi bo‘yicha o‘zgartirish va qo‘shimchalar kiritilgan. O‘zgartirishlarga ko‘ra, “yashab turgan joydagi” degan so‘zlar o‘rniga “doimiy yashash yoki vaqtincha turgan joyi bo‘yicha ro‘yxatdan o‘tgan joydagi” degan so‘zlar qo‘llaniladi. Bundan tashqari, quyidagilar o‘zgartirildi:
- 225-moddaga ko‘ra, endi o‘limni qayd etish uchun FHDY organiga marhumning shaxsini tasdiqlovchi hujjatlar taqdim etilishi talab qilinmaydi;
- 228-moddaning 4-qismiga ko‘ra, O‘zbekiston hududidan tashqarida tuzilgan fuqarolik holati dalolatnomalari yozuvlariga tuzatishlar kiritish haqidagi arizalarni ko‘rib chiqish ariza beruvchining arizasida ko‘rsatilgan joydagi fuqarolik holati dalolatnomalarini yozish organi tomonidan amalga oshiriladi. Oldingi tahririda, yuqorida ko‘rsatilgan dalolatnomalar ariza beruvchining yashash joyidagi FHDY organida ko‘rib chiqilar edi.
Soliq kodeksining 126-moddasiga qo‘shimchalar kiritildi. Ularga ko‘ra, jismoniy shaxslarni soliq organlarida soliq to‘lovchi sifatida hisobga qo‘yish ularga vakolatli organ tomonidan identifikatsiyalovchi ID-kartalarni yoki jismoniy shaxsning shaxsiy identifikatsiya raqamini berish bilan bir vaqtda amalga oshiriladi. Bunda soliq to‘lovchi hisobga qo‘yilganligini tasdiqlovchi alohida hujjat berilmaydi.
O‘zbekiston Respublikasining yuridik shaxsini davlat ro‘yxatidan o‘tkazish chog‘ida u bir vaqtning o‘zida soliq organlarida va davlat statistika organlarida hisobga qo‘yilgan holda berilgan davlat ro‘yxatidan o‘tkazilganlik to‘g‘risidagi guvohnoma soliq to‘lovchining hisobga qo‘yilganligini tasdiqlovchi hujjatdir.
Chet davlatlarning qonunchiligiga muvofiq tashkil etilgan chet el yuridik shaxslariga (shu jumladan kompaniyalar va boshqa korporativ tuzilmalarga) berilgan soliq to‘lovchining identifikatsiya raqami to‘g‘risidagi guvohnoma soliq to‘lovchining ro‘yxatdan o‘tkazilganligini tasdiqlovchi hujjatdir.
“Davlat boji to‘g‘risida”gi qonunga o‘zgartirishlar kiritildi va ularga ko‘ra, endilikda O‘zbekiston fuqarolari davlat bojini to‘lashdan quyidagi hollarda ozod qilinadi:
O‘zbekiston fuqarosining xorijga chiqish uchun biometrik pasportini:
- voyaga yetmagan shaxsga, shuningdek unga hamrohlik qiluvchi shaxsga xorijiy davlatda ixtisoslashgan tibbiy yordam ko‘rsatilganda yoki jarrohlik amaliyoti o‘tkazilganda;
- voyaga yetmagan shaxs ilm-fan, ta’lim, sport yoki madaniyat sohalaridan biridagi xalqaro tadbirda yoki musobaqada ishtirok etganda;
- ijtimoiy himoya yagona reyestriga kiritilgan shaxsga, shuningdek unga hamrohlik qiluvchi shaxsga xorijiy davlatda ixtisoslashgan tibbiy yordam ko‘rsatilganda yoki jarrohlik amaliyoti o‘tkazilganda berganlik uchun;
- yetim bolaga yoki ota-ona qaramog‘idan mahrum bo‘lgan bolaga identifikatsiyalovchi ID-kartasini berganlik uchun.
Izoh (0)