Namangan shahrining Davlatobod tumanida quyonchilikni rivojlantirishga bag‘ishlangan tadbir bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Ikki kun davom etgan tadbir zotli quyonlar ko‘rgazmasi va tajribali mutaxassislar ishtirokidagi seminar-treningdan iborat bo‘ldi.
Ushbu tadbir tumandagi “Yelxon” mahallasi hokim yordamchisi Adham Majidovning tashabbusi va tuman hokimligi, M-Club quyonchilar assotsiatsiyasi ko‘magida o‘tkazildi.
Unda Namangandan tashqari Farg‘ona, Andijon, Toshkent, Samarqand, Jizzax, Buxoro viloyatlari hamda qo‘shni Qirg‘izistondan kelgan quyonchilik bilan shug‘ullanuvchi tadbirkor va fermerlar ishtirok etdi.
“Ko‘rgazmada ‘Velikan’, ‘Trikolor’, ‘Kaliforniya’ kabi 500 dan ortiq zotli quyonlar namoyish etildi. Quyon terisidan tayyorlangan turli materiallar ham ko‘pchilikning e’tiborini o‘ziga tortdi. Seminar-treningda esa zotli quyonlarni parvarishlash va yetishtirish, quyonchilikdan daromad topish, aholini shu yo‘nalishdagi yumushlar bilan band qilish borasida tavsiya va maslahatlar berildi, tajribalar o‘rtoqlashildi”, — deydi Davlatobod tuman hokimligi axborot xizmati rahbari Oybek Narzullayev.
Tadbir yakunida tashkilotchilar va faol ishtirokchilar Davlatobod tuman hokimligining tashakkurnomalari bilan taqdirlandi.
Izoh (0)