Наманган шаҳрининг Давлатобод туманида қуёнчиликни ривожлантиришга бағишланган тадбир бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Икки кун давом этган тадбир зотли қуёнлар кўргазмаси ва тажрибали мутахассислар иштирокидаги семинар-тренингдан иборат бўлди.
Ушбу тадбир тумандаги «Елхон» маҳалласи ҳоким ёрдамчиси Адҳам Мажидовнинг ташаббуси ва туман ҳокимлиги, M-Club қуёнчилар ассоциацияси кўмагида ўтказилди.
Унда Намангандан ташқари Фарғона, Андижон, Тошкент, Самарқанд, Жиззах, Бухоро вилоятлари ҳамда қўшни Қирғизистондан келган қуёнчилик билан шуғулланувчи тадбиркор ва фермерлар иштирок этди.
«Кўргазмада ‘Великан’, ‘Триколор’, ‘Калифорния’ каби 500 дан ортиқ зотли қуёнлар намойиш этилди. Қуён терисидан тайёрланган турли материаллар ҳам кўпчиликнинг эътиборини ўзига тортди. Семинар-тренингда эса зотли қуёнларни парваришлаш ва етиштириш, қуёнчиликдан даромад топиш, аҳолини шу йўналишдаги юмушлар билан банд қилиш борасида тавсия ва маслаҳатлар берилди, тажрибалар ўртоқлашилди», — дейди Давлатобод туман ҳокимлиги ахборот хизмати раҳбари Ойбек Нарзуллаев.
Тадбир якунида ташкилотчилар ва фаол иштирокчилар Давлатобод туман ҳокимлигининг ташаккурномалари билан тақдирланди.
Изоҳ (0)