O‘zbekiston Qozog‘iston bilan emlanganlik sertifikatlarini tan olish bo‘yicha kelishuvga erishdi. Bu haqda Sanitariya-epidemiologiya xizmati xabar qildi.
Qayd etilishicha, endi tomonlarda emlanganlik to‘g‘risidagi sertifikatlar mavjud bo‘lganda PZR usuli bo‘yicha COVID test natijasi salbiy bo‘lgan sertifikatlarni taqdim etish talab etilmaydi.
Shuningdek, 5 yoshgacha bo‘lgan bolalarga hamroh bo‘lgan shaxslar uchun emlash sertifikatlari mavjud bo‘lsa, PZR-testidan o‘tganlik to‘g‘risidagi guvohnoma taqdim etish talab qilinmaydi.
5 yoshdan oshgan bolalar, hamrohlik qiluvchi shaxslarning emlash sertifikatlari bor-yo‘qligidan qat'i nazar, PZR-testidan o‘tganlik to‘g‘risidagi guvohnomani taqdim etishi shart.
Kelishuv joriy yilning 18-martidan amal qilishni boshlagan.
Eslatib o‘tamiz, O‘zbekiston bundan avval Buyuk Britaniya, Tojikiston va Turkiya bilan ham emlanganlik sertifikatlarini o‘zaro tan olish kelishuviga erishgan.
Avvalroq O‘zbekiston fuqarolari va chet ellik sayyohlar uchun chegaralarni kesib o‘tishning amaldagi tartibiga qo‘shimchalar kiritilayotgani xabar qilingandi. Unga ko‘ra, endi 12 yoshgacha bo‘lgan bolalarni O‘zbekistonga olib kirishda PZR-testini taqdim etish talab qilinmaydi.
Izoh (0)