O‘zbekiston musulmonlari idorasi Ramazon oyida Umra safarlarini tashkil etish yuzasidan ma’lumotlar taqdim etdi.
Ta’kidlanishicha, Saudiya Arabistonida COVID-19 pandemiyasi bilan bog‘liq o‘rnatilgan karantin talablari asta-sekin yumshatilib, Saudiya hukumati tomonidan barcha davlatlar, xususan, Turkiya, Malayziya, Indoneziya, Eron va Misr kabi yirik musulmon mamlakatlariga Umra ziyoratini tashkil etishga ruxsat berildi.
Bu esa, o‘z navbatida, mehmonxona va boshqa turdagi servislarga talab oshishiga, xususan, Ramazon oyida tashkil etiladigan Umra tadbirlarining narx-navosiga ta’sir ko‘rsatishiga sabab bo‘lishi haqida ham ma’lumot berilgan edi.
“O‘zbekiston musulmonlari idorasi tomonidan hamkor shirkat vakillari bilan Ramazon oyida tashkil etiladigan Umra ziyorati yuzasidan muzokaralar olib borildi va belgilanadigan narx bo‘yicha o‘zaro kelishuvga erishildi.
Ta’kidlash zarurki, Ramazon oyida Saudiya Arabistonidagi mavjud sharoitdan kelib chiqib, xizmat ko‘rsatish narxlari oshayotgan bo‘lsa-da, sa’y-harakatlar natijasida Shavvol oyida (Ramazon oyidan keyin) Umra mavsumining oxirigacha ziyoratchilarning safar xarajatlari uchun amaldagi mavjud qiymat saqlab qolinadi.
Yana bir muhim masala, yurtdoshlarimizning Umra ziyoratiga bo‘lgan talab va istaklarini inobatga olib, Umra safarini sayyohlik firmalari orqali ham qisman tashkil etish masalasi ko‘rib chiqilayotganini ma’lum qilamiz”, – deyiladi idora xabarida.
Mavzuga doir:
- Saudiya Arabistoniga safar qiladigan ziyoratchilar uchun PZR-test ma’lumotini taqdim etish tartibi bekor qilindi
- “Umrachilar soni 10 ming nafarga yetdi, yana qancha boradiganlar bo‘lsa, shuncha o‘rin beriladi” — Musulmonlar idorasi raisi
- O‘zbekistondan Saudiya Arabistoniga Umra safari uchun reyslar bir haftada 16 marta amalga oshiriladi
Izoh (0)