Buxoroga qo‘shni davlatdan hujjatlarda qayd etilmagan salkam 14 milliard so‘mlik noqonuniy mahsulotlar olib kirilgan. Bu haqda “Daryo”ga viloyat bojxona boshqarmasi axborot xizmati rahbari Javohir Ismoilov xabar berdi.
Ta’kidlanishicha, viloyat bojxona boshqarmasi xodimlari “Xo‘jadavlat” temiryo‘l chegara bojxona posti orqali O‘zbekistonga olib kelingan konteynerlarni nazoratdan o‘tkazgan.Hujjatlarga ko‘ra, konteynerlarda 24 tonna 500 kilogramm og‘irlikdagi asosan protein, kosmetika mahsulotlari va gazlamalar olib kelingan. Biroq o‘tkazilgan tekshiruv natijasida esa konteynerda hujjatlarda ko‘rsatilganidan ortiqcha hamda hujjatlarda umuman ko‘rsatilmagan 24 turdagi tovarlar, shu jumladan, parfyumeriya va kosmetika mahsulotlari, maishiy texnika va mebellar, oziq-ovqat va kiyim-kechaklar ortilgani aniqlangan. Mazkur tovarlarning umumiy qiymati 13 milliard 679 million so‘mdan iborat bo‘lgan.
“Ushbu mahsulotlar qonuniy yo‘llar bilan respublikamizga import qilinganida edi, davlatimiz budjetiga 2 milliard 183 million so‘mlik bojxona to‘lovlari undirilgan bo‘lar edi”, — dedi Javohir Ismoilov.
Hozirda holat yuzasidan bojxona organlari tomonidan surishtiruv harakatlari davom ettirilmoqda.
Izoh (0)