Фарғона вилоятининг Фарғона шаҳридаги кўп қаватли уйларнинг бирида хонадон эшиги қулфланиб қолиши оқибатида ичкарида ёлғиз қолган икки нафар бола қутқарилди. Бу ҳақда «Дарё»га вилоят Фавқулодда вазиятлар бошқармаси ахборот хизмати хабар берди.
Маълум бўлишича, 2022 йилнинг 15 март куни соат 17:30 да Фарғона шаҳар Мураббийлар кўчаси 3-уйдаги хонадонларнинг бирида яшовчи фуқаро Н.А. яшаш хонадонининг кириш эшиги қулфланиб қолиб, бир ва икки ярим ёшли фарзандлари ичкарида ёлғиз қолгани ҳақида 1050 қисқа рақами орқали мурожаат қилиб, ёрдам сўраган.
Фавқулодда вазиятлар бошқармаси махсус вазифаларни бажарувчи минтақавий қутқарув отряди ходимлари айтилган манзилга соат 17:41 да етиб бориб, арқон ёрдамида уйнинг том қисми орқали уйга кирган. Махсус мосламалар ёрдамида хонадоннинг темир эшигини очиб, фуқарога амалий ёрдам кўрсатган. Уй ичида қолган икки нафар бола соғ-саломат яқинларига топширилган.
Изоҳ (0)