Buxoro shahridagi tug‘uruq kompleksida egizak farzandlarni dunyoga keltirgan ayol kuchli anafilaktik reaksiya ta’sirida vafot etgani aytildi. Bu haqda “Daryo”ga tug‘uruqxona bosh shifokori Zaynab Saidova ma’lum qildi.
Ta’kidlanishicha, Buxoro shahridagi “Shayxon” mahallasida yashovchi 23 yoshli fuqaro S.F. 9-mart kuni tug‘uruq kompleksiga keltirilgan. Shu kunning o‘zida egiz homilaning birinchisi chanoq bilan kelgani, qog‘anoq pardasi tug‘uruqdan oldin yorilgani hisobga olinib, kesarcha kesish operatsiyasi bajarilgan. Operatsiyadan oldin 2,0 gramm “Seftriakson” vositasi sinama (proba)dan o‘tkazilgan. Qog‘anoq suvlari ketgani va tug‘uruqdan keyingi septik asoratlarning oldini olish maqsadida antibakterial terapeyani davom ettirish buyurilgan.10-mart kuni soat 23:00 da bemorga to‘rt doza antibiotik “Seftriakson natriya” qilingan. Bemorda kuchli anafilaktik reaksiya kuzatilgan. Bemor o‘ta og‘ir ahvolda bo‘lgan, sun’iy nafas oldirish apparatiga ulangan. Lekin reanimatsion choralar samarasiz kechgan va bemorda 11-mart kuni soat 15:35 da biologik o‘lim qayd etilgan.
“Antibiotik ‘Seftriakson natriya’ — Dentafill plyus mas’uliyati cheklangan jamiyati tomonidan chiqarilgan bo‘lib, ushbu vositaning qo‘llanish qog‘ozidagi manbaga ko‘ra, 10122 seriyasi ostida 2021-yilning oktabr oyida ishlab chiqarilgani va yaroqlilik muddati 2024-yilning oktabr oyiga qadar ekani qayd etilgan. Vosita tug‘uruq kompleksi yonidagi ‘Karim med farm’ dorixonasidan olingan”, — deydi Zaynab Saidova.
Tug‘uruq kompleksi bosh shifokorining so‘ziga ko‘ra, bemorga ushbu dori vositasi to‘rt marotaba qilingan bo‘lib, birinchi o‘tkazuvda sinama qo‘llangan.
Homila operatsiyasi uzoq yillik tajribaga ega shifokor M.A. tomonidan amalga oshirilgan.
“Shifokorlar hech qachon qasddan inson hayotini xavfga qo‘ymaydi. Alloh amri oldida hamma ojiz”, — deydi viloyat sog‘likni saqlash boshqarmasi boshlig‘i o‘rinbosari Ixtiyor Abdulhaqov.
Avvalroq marhumaning o‘limi sabablarini aniqlash maqsadida sudga oid tibbiy ekspertizasi tayinlangani, holat yuzasidan Buxoro shahar prokuraturasi tomonidan tergovga qadar tekshiruv harakatlari olib borilayotgani xabar berilgandi.
Mavzuga doir: Andijondagi tug‘uruqxonada yosh ona o‘zini osib qo‘ydi
Izoh (0)