O‘zbekistonda mart oyi boshlaridan buyon yomg‘irli ob-havo davom etmoqda. Yog‘ingarchilik viloyatlar aholisi uchun qator noqulayliklar tug‘diryapti — ayrim ko‘chalarda to‘planib qolayotgan suv haydovchi va yo‘lovchilar harakatini murakkablashtirayotgan bo‘lsa, dovon yo‘llarida o‘pirilishlar kuzatilmoqda. Ayni paytda Samarqand shahrida suv bosgan ko‘cha va uylardagi to‘planib qolgan suvlarni maxsus xizmat xodimlari nasoslar orqali tortib chiqarmoqda. Bu haqda shahar hokimligi matbuot xizmati xabar berdi.
Toshkent viloyati hokimligining ma’lum qilishicha, aholidan kelib tushayotgan murojaatlar asosida qutqaruvchilar tomonidan maxsus texnikalar yordamida mahalla ko‘chalariga, ariqlarga hamda aholi hovlilariga to‘planib qolayotgan suvlarni tortish ishlari davom etmoqda.
“Shu o‘rinda viloyat Favqulodda vaziyatlar boshqarmasi aholidan sarosimaga tushmaslikni, yog‘ingarchilik tufayli yuzaga kelayotgan vaziyatlarda xushyorlik va ehtiyotkorlikni oshirishni so‘rab qoladi”, — deyiladi xabarda.
“O‘zgidromet” xabariga ko‘ra, 17—20-mart kunlari O‘zbekiston hududiga Erondan iliq va nam havo, so‘ngra Volgabo‘yi hududlaridan sovuq havo massasi kirib kelishi kutilmoqda. Kuchli yomg‘irlar sababli O‘zbekistonning 9 ta viloyatida sel kelish xavfi e’lon qilingan.
Izoh (0)