Rossiyaning Ural Airlines kompaniyasi 14-mart kuni O‘zbekistonga parvozlarni vaqtincha amalga oshira olmadi, deb xabar beradi Telegram’dagi “Aviatorshina” kanali.
14-mart kuni Ural Airlines’ning “Pulkovo” aeroportidan Buxoroga (uchish soat 09:00 da), “Jukovskiy” aeroportidan Namanganga (uchish soat 22:30 da), “Mineralniye vodi”dan Samarqandga (uchish soat 23:15 da), “Domodedovo” aeroportidan Urganchga (uchish soat 23:30 da) parvozlari rejalashtirilgan edi. Biroq aviakompaniyaning onlayn tablosida O‘zbekstonga barcha parvoz vaqtlari 15-martga surilgani ko‘rsatilgan.
Unga ko‘ra, Buxoroga parvoz 28 soat kechikish bilan, Namanganga 14,5 soat, Samarqandga qariyb 14 soat, Urganchga 13,5 soat kechikish bilan tashkil etiladi. Qaytib uchib ketish ham 13–18 soatga surilgan.
Aviakompaniyadagi manbaning so‘zlariga ko‘ra, reyslarni amalga oshirishdagi uzilishlarga parvozlar uchun yaroqlilik sertifikatlarining yo‘qligi sabab bo‘lgan. Dushanbaga o‘tar kechasi Bermud orollari aviatsiya hokimiyati Rossiyaning shu davlatda ro‘yxatga olingan 700 dan ortiq samolyotlarining parvozga yaroqlilik sertifikatlarini to‘xtatgan.
Ural Airlines’ning butun parki Bermud orollarida ro‘yxatga olingan, shuningdek, xorijiy lizingga beruvchilardan ijaraga olingan bo‘lib, mart oyining so‘ngiga qadar ular Ural aviatashuvchisining barcha samolyotlarini qaytarib olishi kerak.
Eslatib o‘tamiz, Uzbekistan Airways esa Rossiya havo hududining bir qismi yopilishi bilan bog‘liq cheklov sabab bir qator shaharlarga parvozlar jadvali va yo‘nalishini o‘zgartirdi. Unga ko‘ra, 3-martdan 26-martgacha O‘zbekiston—Sochi—O‘zbekiston yo‘nalishida qo‘shimcha qatnovlar joriy etilib, Krasnodar va Rostov-Don shaharlariga rejalashtirilgan parvozlar Sochi shahriga amalga oshiriladi.
Shuningdek, Rossiyaning iFly aviakompaniyasi 5-mart sanasidan boshlab O‘zbekistonga bajarilishi kutilayotgan hamda barcha rejalashtirilgan yo‘nalishlarda o‘z parvozlarini noma’lum muddatga to‘xtatgandi. Shuningdek, Smartavia aviakompaniyasi ham 7-mart kuniga rejalashtirilgan Moskva—Urganch—Moskva yo‘nalishidagi parvozni bekor qilgandi.
Izoh (0)