Buxoro shahrida joylashgan “Moxi Xossa” tug‘ruqxonasida 23 yoshli ayol vafot etgani to‘g‘risida xabarlar tarqaldi. Bosh prokuratura matbuot xizmati holatga munosabat bildirib, tergovga qadar tekshiruv harakatlari olib borilayotganini ma’lum qildi.
Aniqlanishicha, Buxoro shahrida yashagan ayol (1999-yilda tug‘ilgan) 9-mart kuni tug‘ish uchun kasalxonaga kelib, egizak farzandlarni dunyoga keltirganidan ikki kun o‘tib, vafot etgan.
Viloyat sog‘liqni saqlash boshqarmasi boshlig‘ining onalik va bolalikni muhofaza qilish bo‘yicha o‘rinbosari Nodir Jo‘rayevning “Daryo”ga bildirishicha, homilasi jarrohlik yo‘li orqali olingan marhuma antibiotik vositalar ta’sirida vafot etgan bo‘lishi mumkin.
Marhumaning o‘limi sabablarini aniqlash maqsadida sudga oid tibbiyot ekspertizasi tayinlangan.Hozirda Buxoro shahar prokuraturasi tomonidan tergovga qadar tekshiruv harakatlari olib borilmoqda.
Eslatib o‘tamiz, 2019-yilning iyulida Urgutda homilador ayol tug‘ruq vaqtida vafot etgan, 2020-yilning avgustida Farg‘onada 33 yoshli homilador ayol o‘limiga sababchi bo‘lgan shifokorga sud hukmi o‘qilgan, 2021-yilning martida esa Xorazmda 36 yoshli ayol va uning chaqalog‘i tug‘ruq vaqtida vafot etgandi.
Mavzuga doir: Andijondagi tug‘ruqxonada yosh ona o‘zini osib qo‘ydi
Izoh (0)