Buxoro shahrida 11-mart kuni kechki payt hafta davomida muttasil yog‘gan yomg‘ir oqibatida “Talipoch qal’a darvozasi” chap tomonidagi qal’a devorining bir qismi qulab tushdi. Bu haqda Madaniy meros agentligi xabar qildi.
Qayd etilishicha, 12-mart kuni Buxoro viloyat hokimligi, viloyat Madaniy meros va favqulodda vaziyatlar boshqarmalari, Buxoro mintaqaviy restavratsiya markazi mas’ul xodimlari va maxsus ekspertlaridan iborat jamoatchilik ilmiy maslahat kengashi a’zolari hodisa joyida o‘rganish ishlarini olib borgan.
XVI asrga tegishli “Talipoch qal’a darvozasi” 2003-yilda qayta tiklangan. O‘tgan yillar davomida qal’a atrofidagi devorning chap qanoti ortidagi madaniy qatlamlarning cho‘kishi, qoplama devorlarida yoriqlar paydo bo‘lishi hamda mart oyida kuzatilgan doimiy yog‘ingarchilik devorning cho‘kishi va qulab tushishiga olib kelgani aniqlangan.
Ta’kidlanishicha, “Talipoch qal’a darvozasi” 2022-yil davomida asrashga doir ishlar amalga oshiriladigan moddiy madaniy meros ko‘chmas mulk obyektlarining manzilli ro‘yxatiga kiritilgan.
Hozirda soha mutasaddilari va mutaxassislar tomonidan mazkur obyektning atrofini o‘rab olish, mazkur hududda yashovchi fuqarolar va obyektga tashrif buyuruvchi sayyohlar xavfsizligini ta’minlash choralari ko‘rilgan. Shuningdek, Buxoro viloyati Madaniy meros boshqarmasi va ekspertlar tomonidan obyektning texnik holati o‘rganilib va uni tezkorlik bilan qayta tiklash choralarini ko‘rish bo‘yicha muhokamalar olib borilgan.
Madaniy meros agentligi obyektda 2003-yilda restavratsiya ishlari amalga oshirilgan bo‘lsa-da, shoshma-shosharlikka yo‘l qo‘yilgani, ta’mirlash ishlari malakali ustalar tomonidan olib borilmagani o‘z ta’sirini ko‘rsatganini bildirgan.
“Endilikda bu kabi kamchiliklarning oldini olish maqsadida Turizm va madaniy meros vazirligi huzuridagi Madaniy meros agentligi tomonidan madaniy meros obyektlarini restavratsiya ishlarini puxta o‘ylangan reja asosida, malakali mutaxassislar ishtirokida amalga oshirish choralari ko‘rilmoqda”, — deyiladi xabarda.
Shuningdek, Farg‘ona viloyati Marg‘ilon shahri “Guravel” mahallasida joylashgan Safed to‘da masjidi devorining bir qismi qulab tushgan. Muammo yuzasidan viloyat Madaniy meros boshqarmasi xodimlari tomonidan ishchi guruh tuzilgan. Mas’ullar masjid binosini o‘rganish va uning qolgan qismini asrab qolish uchun chora-tadbirlar ko‘rmoqda.
Avvalroq kuchli yomg‘ir yog‘ishi oqibatida Taxtaqoracha dovonining avtomobil yo‘lida qisman o‘pirilish yuzaga kelgandi. Shu sababli 13-mart kuni soat 16:00 dan dovon yo‘li avtomobillar harakati uchun yopildi.
Eslatib o‘tamiz, kecha, 12-mart kuni Toshkent shahri Mirzo Ulug‘bek tumanida avtomobillar ustiga daraxt qulab tushgandi. Favqulodda vaziyatlar vazirligi fuqarolardan kuchli shamol va yog‘ingarchilik vaqtida avtotransport vositalarini daraxtlar ostida qoldirmaslikni so‘ragan.
Shuningdek, Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan.
Toshkent shahrida bir necha kundan buyon davom etayotgan yog‘ingarchilik poytaxt aholisi uchun qator noqulayliklar tug‘dirmoqda. Ayrim ko‘chalarda to‘planib qolayotgan suv haydovchi va yo‘lovchilar harakatini murakkablashtirmoqda. “Daryo” holatga aniqlik kiritish maqsadida Toshkent shahar hokimligidan izoh oldi. Hokimlik ko‘chalarda suv yig‘ilib qolishiga odamlar tomonidan tashlab ketilgan axlatlarni sabab qilib ko‘rsatdi.
“O‘zgidromet” ma’lumotiga ko‘ra, vaqti-vaqti bilan yomg‘ir yog‘ishi kuzatiladigan beqaror ob-havo keyingi haftaning birinchi yarmigacha saqlanib turadi. Ayrim viloyatlarda kuchli shamol va momoqaldiroq bo‘lishi mumkin.
Izoh (0)