Бухоро шаҳрида 11 март куни кечки пайт ҳафта давомида муттасил ёғган ёмғир оқибатида «Талипоч қалъа дарвозаси» чап томонидаги қалъа деворининг бир қисми қулаб тушди. Бу ҳақда Маданий мерос агентлиги хабар қилди.
Қайд этилишича, 12 март куни Бухоро вилоят ҳокимлиги, вилоят Маданий мерос ва фавқулодда вазиятлар бошқармалари, Бухоро минтақавий реставрация маркази масъул ходимлари ва махсус экспертларидан иборат жамоатчилик илмий маслаҳат кенгаши аъзолари ҳодиса жойида ўрганиш ишларини олиб борган.
XVI асрга тегишли «Талипоч қалъа дарвозаси» 2003 йилда қайта тикланган. Ўтган йиллар давомида қалъа атрофидаги деворнинг чап қаноти ортидаги маданий қатламларнинг чўкиши, қоплама деворларида ёриқлар пайдо бўлиши ҳамда март ойида кузатилган доимий ёғингарчилик деворнинг чўкиши ва қулаб тушишига олиб келгани аниқланган.
Таъкидланишича, «Талипоч қалъа дарвозаси» 2022 йил давомида асрашга доир ишлар амалга ошириладиган моддий маданий мерос кўчмас мулк объектларининг манзилли рўйхатига киритилган.
Ҳозирда соҳа мутасаддилари ва мутахассислар томонидан мазкур объектнинг атрофини ўраб олиш, мазкур ҳудудда яшовчи фуқаролар ва объектга ташриф буюрувчи сайёҳлар хавфсизлигини таъминлаш чоралари кўрилган. Шунингдек, Бухоро вилояти Маданий мерос бошқармаси ва экспертлар томонидан объектнинг техник ҳолати ўрганилиб ва уни тезкорлик билан қайта тиклаш чораларини кўриш бўйича муҳокамалар олиб борилган.
Маданий мерос агентлиги объектда 2003 йилда реставрация ишлари амалга оширилган бўлса-да, шошма-шошарликка йўл қўйилгани, таъмирлаш ишлари малакали усталар томонидан олиб борилмагани ўз таъсирини кўрсатганини билдирган.
«Эндиликда бу каби камчиликларнинг олдини олиш мақсадида Туризм ва маданий мерос вазирлиги ҳузуридаги Маданий мерос агентлиги томонидан маданий мерос объектларини реставрация ишларини пухта ўйланган режа асосида, малакали мутахассислар иштирокида амалга ошириш чоралари кўрилмоқда», — дейилади хабарда.
Шунингдек, Фарғона вилояти Марғилон шаҳри «Гуравел» маҳалласида жойлашган Сафед тўда масжиди деворининг бир қисми қулаб тушган. Муаммо юзасидан вилоят Маданий мерос бошқармаси ходимлари томонидан ишчи гуруҳ тузилган. Масъуллар масжид биносини ўрганиш ва унинг қолган қисмини асраб қолиш учун чора-тадбирлар кўрмоқда.
Аввалроқ кучли ёмғир ёғиши оқибатида Тахтақорача довонининг автомобиль йўлида қисман ўпирилиш юзага келганди. Шу сабабли 13 март куни соат 16:00 дан довон йўли автомобиллар ҳаракати учун ёпилди.
Эслатиб ўтамиз, кеча, 12 март куни Тошкент шаҳри Мирзо Улуғбек туманида автомобиллар устига дарахт қулаб тушганди. Фавқулодда вазиятлар вазирлиги фуқаролардан кучли шамол ва ёғингарчилик вақтида автотранспорт воситаларини дарахтлар остида қолдирмасликни сўраган.
Шунингдек, Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган.
Тошкент шаҳрида бир неча кундан буён давом этаётган ёғингарчилик пойтахт аҳолиси учун қатор ноқулайликлар туғдирмоқда. Айрим кўчаларда тўпланиб қолаётган сув ҳайдовчи ва йўловчилар ҳаракатини мураккаблаштирмоқда. «Дарё» ҳолатга аниқлик киритиш мақсадида Тошкент шаҳар ҳокимлигидан изоҳ олди. Ҳокимлик кўчаларда сув йиғилиб қолишига одамлар томонидан ташлаб кетилган ахлатларни сабаб қилиб кўрсатди.
«Ўзгидромет» маълумотига кўра, вақти-вақти билан ёмғир ёғиши кузатиладиган беқарор об-ҳаво кейинги ҳафтанинг биринчи ярмигача сақланиб туради. Айрим вилоятларда кучли шамол ва момоқалдироқ бўлиши мумкин.
Изоҳ (0)