Қирғизистон ва Тожикистон чегарачилари ўртасида бир кун ичида иккинчи марта отишма содир бўлди. Бу ҳақда Қирғизистон давлат чегара хизмати матбуот хизматига таяниб, «РИА Новости» хабар берди.
«2022 йилнинг 11 март куни соат 02:50 ларда Қирғизистон—Тожикистон давлат чегараси ҳудудида икки мамлакат чегарачилари ўртасида навбатдаги отишма содир бўлди», — дейилади хабарда.
Таъкидлаш керакки, қирғиз-тожик чегарачилари ўртасидаги биринчи отишма 10 март куни эрталаб содир бўлганди. Чегарачилар ўртасида юзага келган можаро оқибатида Тожикистон томонидан бир нафар чегарачи ҳалок бўлган, яна икки нафари яраланган.
Эслатиб ўтамиз, 2022 йилнинг январь охирларида ҳам Қирғизистон ва Тожикистон чегара ҳудудларидан бирида икки давлат ҳарбийлари ўртасида отишма юз берганди. Ўшанда Тожикистон томонидан 11 киши, Қирғизистон тарафидан эса 4 кишига яраланганди.
Тожикистон ва Қирғизистон ўртасидаги бу каби низолар 1990 йиллардан буён кузатилади, икки давлат ўртасида 950 километр чегара ҳудуди белгилаб олинмаган ва унда икки томон келиша олмаётган баҳсли жойлар жуда кўп. Чегарани демаркация ва делимитация қилиш юзасидан музокаралар 2002 йилда бошланган ва шу кунга қадар икки юздан зиёд комиссия йиғилишлари ўтказилиб, ишчи гуруҳлар тузилган. Айни вақтда делимитация ва демаркация қилиш бўйича чегаранинг 550 километрга яқин линияси тартибга солиниши бошланган. Бироқ икки мамлакат ўртасида вақти-вақти билан гоҳ аҳоли, гоҳ чегарачилар ўртасида низолар, отишмалар содир бўлиши тўхтагани йўқ.
Изоҳ (0)