AOKAda 9-iyul, juma kuni Korrupsiyaga qarshi murosasiz muhit yaratish, davlat va jamiyat boshqaruvida korrupsiyaviy omillarni keskin kamaytirishga qaratilgan Prezident farmoni va qarori mazmun-mohiyati hamda ahamiyatiga bag‘ishlangan matbuot anjumani o‘tkazildi. Unda qator vazirlik va idoralar rahbariyati jurnalistlarning savollariga javob qaytardi. Bu haqda “Daryo” muxbiri xabar bermoqda.

Korrupsiyaga qarshi kurashish agentligi direktori Akmal Burhonovning aytishicha, O‘zbekiston Prezidenti va hukumat rahbarining ham yil davomida topgan puli bo‘yicha hisobot topshirishi yo‘lga qo‘yilishi rejalashtirilayotganini qayd etdi.

Akmal Burhonov

Foto: “Daryo”/ Madina Nurman

“Davlat xizmatchilarining mol-mulk va daromadlarini deklaratsiyalash to‘g‘risida”gi qonun loyihasida davlat hokimiyati va boshqaruv organlarining eng yuqori turuvchi rahbaridan tortib, eng quyi pog‘onagacha bo‘lgan — tuman darajasidagi oddiy xodimigacha majburiy deklaratsiyalash tizimiga o‘tiladi. Bu bosqichma-bosqich amalga oshiriladi. Lekin birinchi bosqichdayoq, albatta, “eng yuqoridan boshlab, eng pastga qarab” prinsipi joriy qilinadi. Ya’ni bunga hukumat rahbari, kerak bo‘lsa, davlat rahbari ham kiritiladi. Bu jamoatchilik muhokamasiga qo‘yiladi va muhokama qilinadi.

Qonunga parlament rahbarlari va a’zolari ham, huquqni muhofaza qilish idoralari rahbarlari va xodimlari ham kiritilishi rejalashtirilyapti. Deklaratsiya topshiruvchilarning aniq toifalari, aniq ro‘yxati shakllantiriladi”, — dedi Burhonov.

Eslatib o‘tamiz, Korrupsiyaga qarshi kurashish agentligi amaldorlarning daromadlari deklaratsiya qilinishini nazarda tutuvchi qonun loyihasini ishlab chiqqan edi. Agentlik mas’ul xodimi qonun loyihasida mansabdor shaxslarning barchasi qamrab olingani haqida so‘z yuritib, quyidagi mansabdor shaxalar doirasi qamrab olinganini aytgandi. Bular:

  • Prezident Administratsiyasi;
  • Vazirlar Mahkamasi;
  • Respublika tashkilotlari;
  • Hokimliklar;
  • Huquqni muhofaza qiluvchi organlar;
  • Sud idoralari xodimlari.

Shuningdek, u Prezident va bosh vazir ham daromadlar deklaratsiyasini to‘ldirishi taklif etilganini ta’kidlagan edi.

Qonun loyihasi 2021-yil 25-mart kuni O‘zbekiston Prezidenti Administratsiyasiga kiritildi.