Шавкат Мирзиёев 9 март куни Янги Наманган шаҳарчасининг бош режасини кўриб чиқди. Бу ҳақда Президент матбуот хизмати хабар қилди.
Қайд этилишича, Наманган шаҳри ҳам иқтисодиёт, ҳам нуфус жиҳатидан ўсган. Сўнгги беш йилда шаҳар аҳолиси 152 минг нафарга кўпайган. Шу даврда 300 дан зиёд кўп қаватли уйлар қурилиб, қарийб 65 минг фуқаро янги хонадонга эга бўлган.
Жумладан, Янги Наманган шаҳарчаси лойиҳасининг биринчи босқичида 330 гектар майдонда 8 минг 500 хонадонли 184 та уй-жой қурилган. Шунингдек, 145 гектар майдонда кичик саноат зоналари ташкил этилиб, 10 минг янги иш ўринлари яратилган.
Бугунги кунда Наманган шаҳрида 30 минг фуқаронинг уй-жойга эҳтиёжли ҳисобланади. Келгуси йилларда шаҳар аҳолиси йилига 25 минг нафарга кўпайиши кутилмоқда.
Шу боис Шавкат Мирзиёев сайловолди дастурида Наманган шаҳрини «бир миллионлик шаҳар»га айлантириш ва «Янги Наманган» шаҳарчасини кенгайтиришни айтганди. Тақдимотда ушбу шаҳарчанинг иккинчи босқичи бош режаси кўриб чиқилган.
Унга кўра, 272 гектар майдонда 20 минг хонадонга эга 171 та кўп қаватли уй қурилиши режалаштирилган. Давлат раҳбари уйларнинг сифати, инфратузилмаси қандай бўлиши билан қизиққан. Мутасаддиларга ҳозир кўп қаватли уйларда яшаётган одамлар ва талабгорлар билан учрашиб, уларнинг таклифларини олиш, шу асосида лойиҳани танқидий қайта кўриб чиқиб, батафсил режалаштириш бўйича топшириқ берган.
Ҳудудда уйларни ва муҳандислик-коммуникация тармоқларини тўғри жойлаштириш, биноларда миллий ҳунармандчилигимизга хос безаклардан фойдаланиш муҳимлиги таъкидланган. Шаҳарча ҳудудида иш ўринлари ташкил этиш, хизмат кўрсатишни ривожлантириш бўйича кўрсатмалар берилган. Лойиҳага кўра, бу ерда Янги Ўзбекистон боғини барпо этиш ҳам режалаштирилган.
Президент боғ учун дарахт кўчатларини ҳозирдан етиштириш, кўп қаватли уйлар олдида ва йўл бўйларида ҳам дарахтлар экиш зарурлигини таъкидлаган. Наманган вилоятида кичик саноат зоналари инфратузилмасини яхшилаш, ички йўллар ва ичимлик суви тармоқларини таъмирлаш масалаларига ҳам эътибор қаратилган. Мутасаддиларга ҳоким ёрдамчиси, ёшлар етакчиси ва хотин-қизлар фаоли ишини ташкил этиш, маҳаллаларда спорт майдончалари, маиший хизмат мажмуалари қуриш бўйича топшириқлар берилган.
Эслатиб ўтамиз, Шавкат Мирзиёев 2021 йил 27 сентябрда Янги Наманган шаҳарчаси лойиҳаси билан танишганди. Мазкур лойиҳа учун Давлатобод туманининг «Юксалиш» ҳамда Тўрақўрғон туманининг «Еттикон» маҳаллалари ҳудудидан 1 минг 371 гектар ер ажратилган. У ерда 410 та кўп қаватли уй, 7 та мактаб, 4 та болалар боғчаси, шунингдек, кўплаб инфратузилма иншоотлари барпо этилиши режалаштирилган.
Изоҳ (0)