Qashqadaryo viloyati Dehqonobod tumani “Otkamar” MFYda 9-mart kuni soat 11:45 da noqulay ob-havo sharoiti natijasida 3 nafar fuqaroni yashin urgani xabar qilingandi. Nasafnews holat yuzasidan qo‘shimcha ma’lumot berdi.
Voqea oqibatida bir nafar fuqaro vafot etib, ikki nafar fuqaroning biriga tibbiy yordam ko‘rsatilib, ambulator davolanishga ruxsat berilgandi.
Qayd etilishicha, yashin urishi oqibatida vafot etgan erkak 63 yoshda bo‘lgan. Uning jarohat olgan 37 yoshli va 42 yoshli o‘g‘illari ayni paytda shifoxonada davolanmoqda.
Hozirda holat yuzasidan surishtiruv ishlari olib borilmoqda.
Avvalroq “O‘zgidromet” Erondan va Kaspiy dengizi hududlaridan bir qator nam havo massalari kirib kelishi hisobiga ish haftasining oxirigacha respublika hududlari bo‘yicha beqaror ob-havo saqlanib turishini ma’lum qilgandi. Shuningdek, “O‘zgidromet” Toshkentda yaqin 2 soat ichida kuchli momaqaldiroq kuzatilib, shamol tezligi kuchayishidan ogohlantirgan.
Izoh (0)