“Ehtiyot bo‘ling, eshiklar yopiladi, keyingi bekat... Hurmatli yo‘lovchilar, iltimos, yosh bolali, nogiron va yoshi katta yo‘lovchilarga joy bering”. Ushbu jumlalar bilan yangraydigan e’lon-ogohlantirishni Toshkent metrosiga bir marta tushgan yo‘lovchi ham yodlab olishi tayin. Ovoz sohibasi kim ekaniga qiziqadiganlar esa ko‘pchilik bo‘lishi mumkin. “Daryo” muxbiri 15 yildan beri ovozi metroda jaranglaydigan suxandon, “O‘zbekiston” radiosi boshlovchisi Muslima Murodova bilan suhbatlashdi.
— Metroda ovozingizning yangrayotganiga necha yil bo‘ldi? E’lonni o‘qish uchun suxandonlar o‘rtasida kasting bo‘lib o‘tganmi? Hammasi nimadan boshlangan edi?
— Metrodagi ovozimning yozib olinganiga shu yilning iyun oyida 15 yil bo‘ladi. Ungacha “O‘zbekiston” radiosining diktorlar guruhida faoliyat yuritgan ustozlarimiz: Tuhfa Ahmedova, Ra’no Dehqonova hamda Manzura Ahmadaliyevalarning ovozi yangragan.
Metropolitenning mas’ul xodimi radioga kelib, bir qancha diktorlarning ovozini eshitib ko‘rgan. Hamkasbimiz Shuhrat aka Oripovning taklifi bilan men ham kichik kastingda qatnashganman. Shu tariqa ovozim ularga ma’qul kelib, metroning 3 ta liniyasidagi barcha bekatlar uchun e’lon o‘qiganman. Adashmasam, 37 ta bekat edi. Keyinchalik yangi liniyalar ochildi, ularga boshqalar e’lon o‘qigan. Bugungi kunda ikkita liniyada ovozim qolgan.
— Yo‘lovchi sifatida metrodan tez-tez foydalanasizmi? Qaysidir bekatga tushganda ovozingizni eshitib, nimalarni his qilasiz?
— Azaldan metroda yurishni yoqtiraman. Deyarli har kuni tushib turaman. Boshida ovozimni eshitib, hayajonlanganman. Yillar o‘tgan sari bunga odatlandim.
Ovozimni eshitish uchun Surxondaryoda yashaydigan tanishlarim, sinfdoshlarim, shogirdlarim atay metroga tushib, “Ovozingizni telefonga yozib oldik, eshitib yuramiz”, — deya menga aytib berishardi. Rahmatli dadam ham atay metroga tushib, ovozimni eshitib, ko‘zlariga yosh kelgan. Onamni ham o‘zim bilan birga olib tushganman.
Ayrim tanishlarim qo‘ng‘iroq orqali gaplashganimizda “O‘zingizni ko‘rmaganimga ancha bo‘ldi, lekin kunora metroda siz bilan g‘oyibona salomlashyapman”, deyishardi (kuladi).
— Oxirgi paytlarda metro yo‘nalishlari, bekatlari soni ko‘payib bormoqda. Lekin ularda boshqa ovozni eshityapmiz. Nima sababdan yangi liniyalardagi e’lonlarni siz o‘qimadingiz?
— Bunga javobni metropoliten mas’ullaridan so‘rash kerak (kuladi). Tanishlar, hamkasblar va muxlislarning ham ko‘pchiligi shuning sababini so‘raydi. Ba’zilar “Iltimos, yangi liniyalarga ham siz o‘qing”, degan gaplarni aytadi. Agar taklif tushsa, albatta, o‘qib berishim mumkin.
— Eshitishimcha, karyerangizni o‘qituvchilikdan boshlagan ekansiz. Ta’limdan radioga o‘tishingizga nima sabab bo‘lgan?
— To‘g‘ri, o‘zbek tili va adabiyoti fani o‘qituvchisi bo‘lganman. Maktabda ishlab yurganimda 8-mart bayrami munosabati bilan katta tadbir o‘tkazib, unga o‘zim boshlovchilik qilganman. Bayram kechasini Surxondaryo viloyat teleradiokompaniyasi vakillari tasvirga olgan. O‘sha tadbirdan so‘ng kastingga taklif etishgan. 107 nafar talabgor ichidan men ham saralab olinganman. 1999-yilda televideniye sohasiga kirib keldim. Ham televideniyeda, ham radioda ishlab, tajriba orttirdim.
Poytaxtdagi faoliyatim 2004-yildan boshlandi. “O‘zbekiston” radiosining diktorlar guruhiga suxandon sifatida ishga qabul qilishgan. Bugungi kunda qator loyihalarda boshlovchilik qilaman. Xususan, “Tungi dildosh” musiqiy kompozitsiyasi, “Yaxshi kayfiyat” tonggi eshittirish dasturi va axborot dasturlarida mikrofon qarshisida o‘tiraman.
— Bir paytlar radio odamlarning ovunchog‘i bo‘lgan. Ammo so‘nggi yillarda ko‘pchilik internetda faol. Ommaning radioga nisbatan bugungi munosabatini qanday baholaysiz?
— Bu gaplarni o‘zim ham ko‘p eshitaman. To‘g‘ri, hozir internet rivojlangan, texnika asrida yashayapmiz. Lekin radiotinglovchilar hamon bor. O‘zbekiston teleradiokompaniyasida to‘rtta radio bo‘lsa, har biri o‘zining doimiy muxlislariga ega. Mazkur radiolar 22 soat faoliyat yuritadi. Tungi efirlarimiz soat 23:00 dan 03:00 gacha davom etadi. Shu vaqt ichida ham bedor bo‘lib, eshituvchilar juda ko‘p. “Radiosiz hayotimni tasavvur qilolmayman”, deydiganlar bor. Bunday iliq va tabiiy gaplarni radio tinglagan odam har kuni eshitishi mumkin.
— Respublika ko‘zi ojizlar jamiyati tomonidan yaratilayotgan audiokitoblarni ham o‘qib berarkansiz. Bu ishni ko‘ngilli ravishda qilasizmi yoki sizni hamkorlikka taklif etishadimi?
— “O‘zbekiston” radiosiga ishga kelgunimga qadar ko‘plab diktorlar ko‘zi ojiz insonlar uchun audiokitoblar o‘qigan ekan. Keyin meni ham taklif qilishgan. Mutolaani yaxshi ko‘rganim uchun ham bu ishni zavq bilan bajaraman. 17 yildan beri jamiyat bilan hamkorlikda ishlab kelyapman. O‘tgan vaqt davomida 600 ga yaqin kitob o‘qidim.
— Bilishimcha, Denov tumanida tug‘ilib, ulg‘aygansiz. Ota-onangiz ijodkor sifatida shakllanishingizga qanday munosabat bildirgan?
— Oilada katta farzandman. Ota-onam san’at, adabiyotni yaxshi ko‘rgan, o‘g‘il-qizlarining ko‘ngliga hamisha qaragan. Rahmatli dadam muallimlarni juda qadrlardi, o‘qituvchilik ular uchun eng ulug‘ kasb edi. Shifokor bo‘lishimni xohlashgan, o‘zimda ham tibbiyot sohasiga qiziqish bo‘lgan. Lekin ko‘ngilchanligim sabab bu sohada ishlay olmasligimni anglab yetganman.
Adabiyotga ham ishtiyoqim kuchli bo‘lgan. O‘quvchilik paytlarimda ko‘p tadbirlarga boshlovchilik qilganman. Yaqinlarim televideniye va radiodagi chiqishlarimni ko‘rib, hamisha qo‘llab-quvvatlagan. Onajonim haligacha muxlis sifatida efirlarimni eshitadi, duo qiladi.
— Farzandlaringiz orasida ijod yo‘lini tanlaganlar bormi?
— Ikki farzandning onasiman. O‘g‘illarimda ijodga, san’atga moyillik bor. To‘ng‘ichim O‘zbekiston davlat san’at va madaniyat institutini tamomlagan. Kichigi shu oliy o‘quv yurtida tahsil oladi. Ikki nafar nevaram bor.
Loyihaning to‘liq variantini “Daryo”ning YouTube’dagi sahifasi orqali tomosha qilishingiz mumkin.
Mirolim Isajonov suhbatlashdi.
Tasvirchi va montajchi: Ilhom Xursanaliyev
Suratga olish jarayoniga amaliy yordam bergani uchun Toshkent metropoliteni matbuot xizmatiga minnatdorchilik bildiramiz.
Izoh (0)