“O‘qituvchi o‘zini o‘nglab olmasa, talabada darsni tashlab chiqib ketishga iroda paydo bo‘ladi” — Abduqodir Toshqulov

Oliy va o‘rta maxsus ta’lim vaziri Abduqodir Toshqulov Buxoro davlat universitetida o‘tkazilgan yig‘ilishda talabalar bilan uchrashuvda ular nimani so‘rayotgani, ta’lim sifatini yaxshilash lozimligi haqida gapirib o‘tdi.

Vazir qariyb barcha oliy ta’lim muassasalariga borib, talabalar bilan uchrashayotgani va ular sifatli ta’lim so‘rayotganini ma’lum qilgan.

“Bugun talaba bizdan nima so‘rayapti? Mana men qariyb hamma oliy ta’lim muassasasiga borib, vazir va talaba uchrashuvini qilyapman. Sifatli ta’lim so‘rayapti. Biz bunga majburmiz, bu uchun oylik olamiz biz. Buning uchun biz galstuk taqib yuribmiz, buning uchun bizni mahallada, ko‘cha-ko‘yda hurmat qilishadi. Oldin hurmatimiz yo‘q edi, mavqe qaytdi hozir.

Auditoriya so‘rayapti. Auditoriya yetmayapti. Rahbariyat kontingentga, ko‘proq pul tushirishga qiziqadi. Bino qurib, maqtanishi kerak chunki. Bu yoqda ta’limning sifati bilan hech kimning ishi yo‘q”, — deydi Toshqulov.

Shuningdek, oliy va o‘rta maxsus ta’lim vazirining so‘zlariga ko‘ra, talabalar ustozlarning yaxshi muomalasi va munosabatini, amaliyot, laboratoriya so‘ramoqda.

“Axborot-resurs markazida talaba sotib olishga iloji yetmagan kitob turmasa, ololgan kitobingizdan 1000 ta olib kelganingiz kimga kerak? Kecha bitta bestseller o‘zbek tiliga tarjima qilindi, shundan 500 ta olib kelib qo‘yadigan mard kerak. Ushbu markazlarda oxirgi yillarda chiqqan kitoblar yo‘q o‘zi.

Sportzal, sport jihozi, musiqa asbobi so‘rayapti talaba. Mana rektor, rahbariyat nima qilib qo‘yishi kerak. Rektorlarimiz ba’zi yig‘ilishlarda ayyuhannos solib, ‘shuncha ish o‘rni tashkil qilamiz, sex ochamiz’, deb. Avval bu yog‘ini qilib qo‘y, birodar. Hamma narsani qog‘ozga o‘rab bo‘ladimi?”, — deya ta’kidlaydi vazir.

Toshqulovning qayd etishicha, o‘qituvchi o‘zini o‘nglab olmasa, talabada darsni tashlab chiqib ketadigan iroda paydo bo‘ladi. “Kechirasiz, domla, bu dars berishingiz bo‘lmaydi, men pul to‘layapman, deya sharmanda qilib chiqib ketadi”, — ta’kidlaydi u.

Eslatib o‘tamiz, oliy va o‘rta maxsus ta’lim vaziri Abduqodir Toshqulov va Ta’lim sifatini nazorat qilish davlat inspeksiyasi boshlig‘i Ulug‘bek Toshkenboyev boshchiligida 1-fevraldan boshlab tuzilgan ishchi guruh respublika oliy ta’lim muassasalarini kompleks o‘rganmoqda. Avvalroq ishchi guruh Qashqadaryo viloyatidagi OTMlarni o‘rganishdan so‘ng, talabalarga Telegram orqali dars berilganini tanqid qilgandi.