Олий ва ўрта махсус таълим вазири Абдуқодир Тошқулов Бухоро давлат университетида ўтказилган йиғилишда талабалар билан учрашувда улар нимани сўраётгани, таълим сифатини яхшилаш лозимлиги ҳақида гапириб ўтди.
Вазир қарийб барча олий таълим муассасаларига бориб, талабалар билан учрашаётгани ва улар сифатли таълим сўраётганини маълум қилган.
«Бугун талаба биздан нима сўраяпти? Мана мен қарийб ҳамма олий таълим муассасасига бориб, вазир ва талаба учрашувини қиляпман. Сифатли таълим сўраяпти. Биз бунга мажбурмиз, бу учун ойлик оламиз биз. Бунинг учун биз галстук тақиб юрибмиз, бунинг учун бизни маҳаллада, кўча-кўйда ҳурмат қилишади. Олдин ҳурматимиз йўқ эди, мавқе қайтди ҳозир.
Аудитория сўраяпти. Аудитория етмаяпти. Раҳбарият контингентга, кўпроқ пул туширишга қизиқади. Бино қуриб, мақтаниши керак чунки. Бу ёқда таълимнинг сифати билан ҳеч кимнинг иши йўқ», — дейди Тошқулов.
Шунингдек, олий ва ўрта махсус таълим вазирининг сўзларига кўра, талабалар устозларнинг яхши муомаласи ва муносабатини, амалиёт, лаборатория сўрамоқда.
«Ахборот-ресурс марказида талаба сотиб олишга иложи етмаган китоб турмаса, ололган китобингиздан 1000 та олиб келганингиз кимга керак? Кеча битта бесцеллер ўзбек тилига таржима қилинди, шундан 500 та олиб келиб қўядиган мард керак. Ушбу марказларда охирги йилларда чиққан китоблар йўқ ўзи.
Спортзал, спорт жиҳози, мусиқа асбоби сўраяпти талаба. Мана ректор, раҳбарият нима қилиб қўйиши керак. Ректорларимиз баъзи йиғилишларда айюҳаннос солиб, ‘шунча иш ўрни ташкил қиламиз, цех очамиз’, деб. Аввал бу ёғини қилиб қўй, биродар. Ҳамма нарсани қоғозга ўраб бўладими?», — дея таъкидлайди вазир.
Тошқуловнинг қайд этишича, ўқитувчи ўзини ўнглаб олмаса, талабада дарсни ташлаб чиқиб кетадиган ирода пайдо бўлади. «Кечирасиз, домла, бу дарс беришингиз бўлмайди, мен пул тўлаяпман, дея шарманда қилиб чиқиб кетади», — таъкидлайди у.
Эслатиб ўтамиз, олий ва ўрта махсус таълим вазири Абдуқодир Тошқулов ва Таълим сифатини назорат қилиш давлат инспекцияси бошлиғи Улуғбек Тошкенбоев бошчилигида 1 февралдан бошлаб тузилган ишчи гуруҳ республика олий таълим муассасаларини комплекс ўрганмоқда. Аввалроқ ишчи гуруҳ Қашқадарё вилоятидаги ОТМларни ўрганишдан сўнг, талабаларга Telegram орқали дарс берилганини танқид қилганди.
Изоҳ (0)