Boris Jonson Ukrainadagi voqealar yuzasidan Rossiyaga bosim o‘tkazish uchun 6 bandlik reja ishlab chiqdi

Buyuk Britaniya bosh vaziri Boris Jonson Ukrainadagi voqealar munosabati bilan Moskvaga bosimni kuchaytirish maqsadida reja ishlab chiqdi. U kelasi hafta qator davlatlar rahbarlari bilan uchrashuvlarda yetakchilarni ushbu rejani amalga oshirishga jalb qilmoqchi, deb yozadi “Interfaks”.

Bosh vazir ofisiga ko‘ra, Moskva Ukrainaga qarshi harakatlarida “muvaffaqiyatsizlikka uchrashi va bu yaqqol ko‘rinib turishi kerak”, buning uchun esa Rossiyaga maksimal darajada zarar yetkazishga qaratilgan sa’y-harakatlarni kuchaytirish zarur.

“Qoidalarga asoslangan xalqaro nizomni qo‘llab-quvvatlashimizni bildirishning o‘zi kifoya emas, biz bu nizomni qoidalarni harbiy kuch yordamida qayta yozishga bo‘layotgan muntazam urinishlardan himoyalashimiz lozim”, —  dedi Jonson bayonotida.

U 7-mart kuni bu masalani Kanada va Niderlandiya rahbarlari bilan, 8-mart kuni esa Chexiya, Vengriya, Polsha va Slovakiya rahbarlari bilan muhokama qilish niyatida.

Jonson uchrashuvlarda o‘zining olti bandlik rejasini e’lon qilmoqchi:

— Ukrainaga gumanitar yordam ko‘rsatish bo‘yicha xalqaro koalitsiya tuzish;

— Ukrainaning o‘zini mudofaa qilish salohiyatini qo‘llab-quvvatlash;

— Rossiyaga iqtisodiy bosimni kuchaytirish;

— Rossiyaning Ukrainadagi faoliyati salbiy normallashishiga yo‘l qo‘ymaslik;

— Yevroatlantika mintaqasida xavfsizlikni mustahkamlash;

— Deeskalatsiyani yo‘qotish uchun Kiyevning to‘liq ishtirokidagi diplomatik yo‘llardan foydalanish.

Rejada G‘arb ittifoqchilarining Ukrainadagi harbiy amaliyotlarda ishtirok etishi nazarda tutilmagan.

24-fevralda Vladimir Putin Ukrainada harbiy operatsiyalar boshlaganini e’lon qilgan. Urushga barham berish yuzasidan birinchi Rossiya–Ukraina muzokaralari 28-fevral kuni Belarusda bo‘lib o‘tgan. Ikkinchi raund ham 3-mart kuni Belarusda o‘tkazildi. Uchinchi raund 5 yoki 6-martda bo‘lib o‘tishi taxmin qilinmoqda. Qirg‘iziston, Turkiya, Vengriya, Ozarbayjon hamda Isroil kabi mamlakatlar ham Rossiya—Ukraina muzokaralari uchun maydon berishga, bu borada vositachilik qilishga tayyorligini bildirgan.