Qo‘qon—Namangan va Namangan—Qo‘qon shaharlararo elektropoyezdi 1-martdan Andijon shahrigacha qatnovini amalga oshirishni boshladi, deb xabar bermoqda “O‘ztemiryo‘lyo‘lovchi”.
Qayd etilishicha, yo‘lovchilarning talab va takliflaridan kelib chiqib, yo‘lovchilarga qulay transport xizmatlarini ko‘rsatish maqsadida, shuningdek, Haqqulobod elektr podstansiyasi to‘liq ishga tushishi munosabati bilan 6381/6382 Qo‘qon—Namangan va Namangan—Qo‘qon shaharlararo elektropoyezdlari Andijon shahrigacha qatnovini amalga oshirishga imkoniyat yaratilgan.
Harakat jadvaliga ko‘ra 6381-sonli Qo‘qon—Namangan—Andijon elektropoyezdi soat 05:00 da Qo‘qon temiryo‘l vokzalidan jo‘naydi. Soat 07:19 da Namangan temiryo‘l vokzaliga kirib boradi. Namangan temiryo‘l vokzalidan soat 07:29 harakatlanib, soat 10:21 da Andijon vokzaliga yetib boradi.
Shuningdek, 6382-sonli Andijon—Namangan—Qo‘qon elektropoyezdi soat 14:12 da Andijon temiryo‘l vokzalidan jo‘naydi. Soat 16:54 da Namangan temiryo‘l vokzaliga yetib boradi. U yerdan soat 17:04 da harakatlanib, Qo‘qon temiryo‘l vokzaliga soat 19:19 da yetib boradi.
Mazkur elektropoyezdlar qatnovi Farg‘ona, Namangan, Andijon viloyatlarining Qo‘qon, Buvaydo, Pop, Chust, To‘raqo‘rg‘on, Chortoq, Uychi, Qug‘ay, Haqqulobod, Poytug‘, Andijon shaharlarini o‘zaro bog‘lab, yo‘lovchilarga yanada ko‘proq transport xizmatlaridan foydalanish imkonini beradi.
Chipta narxlari quyidagicha:
- Qo‘qondan Namangangacha 6 ming so‘m;
- Qo‘qondan Andijongacha 10 ming so‘m;
- Andijondan Qug‘aygacha 4 ming so‘m;
- Andijondan Namangangacha 6 ming so‘m.
Izoh (0)