Қўқон—Наманган ва Наманган—Қўқон шаҳарлараро электропоезди 1 мартдан Андижон шаҳригача қатновини амалга оширишни бошлади, деб хабар бермоқда «Ўзтемир йўлйўловчи».
Қайд этилишича, йўловчиларнинг талаб ва таклифларидан келиб чиқиб, йўловчиларга қулай транспорт хизматларини кўрсатиш мақсадида, шунингдек, Ҳаққулобод электр подстанцияси тўлиқ ишга тушиши муносабати билан 6381/6382 Қўқон—Наманган ва Наманган—Қўқон шаҳарлараро электропоездлари Андижон шаҳригача қатновини амалга оширишга имконият яратилган.
Ҳаракат жадвалига кўра 6381-сонли Қўқон—Наманган—Андижон электропоезди соат 05:00 да Қўқон темир йўл вокзалидан жўнайди. Соат 07:19 да Наманган темир йўл вокзалига кириб боради. Наманган темир йўл вокзалидан соат 07:29 ҳаракатланиб, соат 10:21 да Андижон вокзалига етиб боради.
Шунингдек, 6382-сонли Андижон—Наманган—Қўқон электропоезди соат 14:12 да Андижон темир йўл вокзалидан жўнайди. Соат 16:54 да Наманган темир йўл вокзалига етиб боради. У ердан соат 17:04 да ҳаракатланиб, Қўқон темир йўл вокзалига соат 19:19 да етиб боради.
Мазкур электропоездлар қатнови Фарғона, Наманган, Андижон вилоятларининг Қўқон, Бувайдо, Поп, Чуст, Тўрақўрғон, Чортоқ, Уйчи, Қуғай, Ҳаққулобод, Пойтуғ, Андижон шаҳарларини ўзаро боғлаб, йўловчиларга янада кўпроқ транспорт хизматларидан фойдаланиш имконини беради.
Чипта нархлари қуйидагича:
- Қўқондан Намангангача 6 минг сўм;
- Қўқондан Андижонгача 10 минг сўм;
- Андижондан Қуғайгача 4 минг сўм;
- Андижондан Намангангача 6 минг сўм.
Изоҳ (0)