“Xorijiy mehmonlar, BMT vakillari O‘zbekistonda bo‘layotgan islohotlarning, shu jumladan, terrorizmga qarshi kurashdagi ta’sirini yuqori baholadi” — senator Ravshanbek Alimov

3—4-mart kuni Toshkentda “BMT Global aksilterror strategiyasini amalga oshirish bo‘yicha Qo‘shma harakatlar rejasi doirasida Markaziy Osiyo mamlakatlarining mintaqaviy hamkorligi” mavzusida xalqaro anjuman bo‘lib o‘tdi. 4-mart kuni esa anjuman doirasida turli tadbirlar bo‘lib o‘tdi.

“Daryo” mazkur anjuman haqida Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Ravshanbek Alimov hamda Bosh prokuratura akademiyasi katta o‘qituvchisi Rustamjon Rahimov bilan suhbatlashdi.

Bugungi kunda terrorizmga qarshi kurash biror-bir mamlakat yoki mintaqaning o‘zi bilan hal bo‘lmaydi. Aynan shu g‘oyadan kelib chiqib prezidentimiz BMTning 75-sessiyasida mazkur konferensiyani o‘tkazish taklifini bergandilar va bu narsa bo‘ldi. Konferensiyaning nafaqat yalpi majlisi, balki sessiyalardagi mutaxassislarning fikrlarida terrorizmga qarshi kurashning amaliy tomonlari muhokama qilindi. Bu yerda qandaydir umumiy tavsiyalar yoki avvaldan ma’lum bo‘lgan fikrlar haqida gap ketmayapti, hozirgi kundagi internet va texnologiyalar asridagi terrorizmning yangi ko‘rinishlariga qarshi mutlaqo yangi yondashuv haqida gap ketyapti. Prezidentimiz ham aynan shu jihatdan o‘z tashabbuslarini ilgari surgan.

Hozirgi kundagi terrorizmga qarshi kurash avvalgidek emas, unga ham kompleks yondashuv, nafaqat terrorizmning o‘zi bilan kurashish, balki terrorizm kelib chiqishi mumkin bo‘lgan omillar, masalan, ijtimoiy-iqtisodiy, yoshlar bilan ishlash, tarbiya kabi yondashuv kerak. Ushbu anjuman menga parlament a’zosi sifatida juda katta ahamiyatga ega bo‘ldi. Xorijiy mehmonlar, BMT vakillari O‘zbekistonda bo‘layotgan islohotlarning, shu jumladan, terrorizmga qarshi kurashdagi ta’sirini yuqori baholadi. Qaysi ma’nodaki, O‘zbekistonda o‘tgan 5 yilda olib borilayotgan siyosat, xususan, yoshlar bilan ishlash, mahallabay ishlash tizimi terrorizmga qarshi kurashning uzoq yillarga mo‘ljallangan aniq natijaviy tizimli yondashuv deb tan olindi.

Ravshanbek Alimov, Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi

Unda terrorizmga qarshi kurashish sohasidagi xalqaro tashkilot rahbarlari, milliy ekspertlarimiz, xususan, inson huquqlari bo‘yicha ombudsman ishtirok etdi. Bu konferensiyaning O‘zbekistonda o‘tkazilishi davlatimiz uchun katta yutuq, deb o‘ylayman. Sababi so‘nggi yillarda mamlakatimizda terrorizmga qarshi kurashda juda katta ishlar qilindi. Xalqaro hujjatlar milliy qonunchilikka moslashtirildi, tegishli o‘zgartirishlar kiritildi.

Konferensiyada xalqaro ekspertlarning bergan takliflari, nafaqat O‘zbekiston tomonidan, balki Markaziy Osiyo davlatlarida ham kelajakda o‘z faoliyatlarini takomillashtirish, milliy qonunchilikni yanada takomillashtirish, ayniqsa, inson huquqlarining kafolatlarini ta’minlashda bizga juda katta vosita bo‘lib xizmat qiladi. Biz berilgan taklif va tavsiyalardan faoliyatimizni rivojlantirish uchun samaradorligini ta’minlash uchun foydalanamiz.

Terrorizmning chegarasi yo‘q. U transmilliy jinoyatlar toifasiga kiradi, bu faqatgina O‘zbekiston yoki Markaziy Osiyo hududida emas, balki butun Osiyo hududida yoki butun dunyoda sodir etib kelinmoqda. Konferensiyada ishlab chiqilayotgan takliflar qo‘shma rejalarning ijrosini ta’minlash, berilgan vazifalarni puxta bajarishdan iborat.

Bosh prokuratura aynan terrorizm, uni moliyalashtirishga qarshi kurashish bo‘yicha juda katta ishlarni amalga oshiryapti. Tergov faoliyatida nazorat prinsiplari, inson huquqlarini ta’minlash bo‘yicha xalqaro tashkilotlar bilan katta-katta ishlarni amalga oshirmoqda.

Rustamjon Rahimov, Bosh prokuratura akademiyasi katta o‘qituvchisi

3-mart kuni Oliy Majlis Senati raisining birinchi o‘rinbosari Sodiq Safoyev jurnalistlarga intervyu berib, “avval O‘zbekiston, asosan, ichki va mintaqaviy masalalarni ko‘targan bo‘lsa, yangi mavqega ega bo‘lgan O‘zbekiston umumbashariy muammolarni hal qilishda ham o‘z faolligini ko‘rsatayotganligi” haqida aytgan edi.

“O‘ylaymanki, ushbu xalqaro anjuman ishtirokchilari O‘zbekistonning yangi takliflarini qo‘llab-quvvatlashdi. Bugun bo‘lib o‘tgan majlis yakunida Qo‘shma harakatlar rejasiga doir Toshkent deklaratsiyasi qabul qilindi”, — degan edi Sodiq Safoyev