«Хорижий меҳмонлар, БМТ вакиллари Ўзбекистонда бўлаётган ислоҳотларнинг, шу жумладан, терроризмга қарши курашдаги таъсирини юқори баҳолади» — сенатор Равшанбек Алимов

3—4 март куни Тошкентда «БМТ Глобал аксилтеррор стратегиясини амалга ошириш бўйича Қўшма ҳаракатлар режаси доирасида Марказий Осиё мамлакатларининг минтақавий ҳамкорлиги» мавзусида халқаро анжуман бўлиб ўтди. 4 март куни эса анжуман доирасида турли тадбирлар бўлиб ўтди.

«Дарё» мазкур анжуман ҳақида Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов ҳамда Бош прокуратура академияси катта ўқитувчиси Рустамжон Раҳимов билан суҳбатлашди.

Бугунги кунда терроризмга қарши кураш бирор-бир мамлакат ёки минтақанинг ўзи билан ҳал бўлмайди. Айнан шу ғоядан келиб чиқиб президентимиз БМТнинг 75-сессиясида мазкур конференцияни ўтказиш таклифини бергандилар ва бу нарса бўлди. Конференциянинг нафақат ялпи мажлиси, балки сессиялардаги мутахассисларнинг фикрларида терроризмга қарши курашнинг амалий томонлари муҳокама қилинди. Бу ерда қандайдир умумий тавсиялар ёки аввалдан маълум бўлган фикрлар ҳақида гап кетмаяпти, ҳозирги кундаги интернет ва технологиялар асридаги терроризмнинг янги кўринишларига қарши мутлақо янги ёндашув ҳақида гап кетяпти. Президентимиз ҳам айнан шу жиҳатдан ўз ташаббусларини илгари сурган.

Ҳозирги кундаги терроризмга қарши кураш аввалгидек эмас, унга ҳам комплекс ёндашув, нафақат терроризмнинг ўзи билан курашиш, балки терроризм келиб чиқиши мумкин бўлган омиллар, масалан, ижтимоий-иқтисодий, ёшлар билан ишлаш, тарбия каби ёндашув керак. Ушбу анжуман менга парламент аъзоси сифатида жуда катта аҳамиятга эга бўлди. Хорижий меҳмонлар, БМТ вакиллари Ўзбекистонда бўлаётган ислоҳотларнинг, шу жумладан, терроризмга қарши курашдаги таъсирини юқори баҳолади. Қайси маънодаки, Ўзбекистонда ўтган 5 йилда олиб борилаётган сиёсат, хусусан, ёшлар билан ишлаш, маҳаллабай ишлаш тизими терроризмга қарши курашнинг узоқ йилларга мўлжалланган аниқ натижавий тизимли ёндашув деб тан олинди.

Равшанбек Алимов, Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси

Унда терроризмга қарши курашиш соҳасидаги халқаро ташкилот раҳбарлари, миллий экспертларимиз, хусусан, инсон ҳуқуқлари бўйича омбудсман иштирок этди. Бу конференциянинг Ўзбекистонда ўтказилиши давлатимиз учун катта ютуқ, деб ўйлайман. Сабаби сўнгги йилларда мамлакатимизда терроризмга қарши курашда жуда катта ишлар қилинди. Халқаро ҳужжатлар миллий қонунчиликка мослаштирилди, тегишли ўзгартиришлар киритилди.

Конференцияда халқаро экспертларнинг берган таклифлари, нафақат Ўзбекистон томонидан, балки Марказий Осиё давлатларида ҳам келажакда ўз фаолиятларини такомиллаштириш, миллий қонунчиликни янада такомиллаштириш, айниқса, инсон ҳуқуқларининг кафолатларини таъминлашда бизга жуда катта восита бўлиб хизмат қилади. Биз берилган таклиф ва тавсиялардан фаолиятимизни ривожлантириш учун самарадорлигини таъминлаш учун фойдаланамиз.

Терроризмнинг чегараси йўқ. У трансмиллий жиноятлар тоифасига киради, бу фақатгина Ўзбекистон ёки Марказий Осиё ҳудудида эмас, балки бутун Осиё ҳудудида ёки бутун дунёда содир этиб келинмоқда. Конференцияда ишлаб чиқилаётган таклифлар қўшма режаларнинг ижросини таъминлаш, берилган вазифаларни пухта бажаришдан иборат.

Бош прокуратура айнан терроризм, уни молиялаштиришга қарши курашиш бўйича жуда катта ишларни амалга оширяпти. Тергов фаолиятида назорат принциплари, инсон ҳуқуқларини таъминлаш бўйича халқаро ташкилотлар билан катта-катта ишларни амалга оширмоқда.

Рустамжон Раҳимов, Бош прокуратура академияси катта ўқитувчиси

3 март куни Олий Мажлис Сенати раисининг биринчи ўринбосари Содиқ Сафоев журналистларга интервью бериб, «аввал Ўзбекистон, асосан, ички ва минтақавий масалаларни кўтарган бўлса, янги мавқега эга бўлган Ўзбекистон умумбашарий муаммоларни ҳал қилишда ҳам ўз фаоллигини кўрсатаётганлиги» ҳақида айтган эди.

«Ўйлайманки, ушбу халқаро анжуман иштирокчилари Ўзбекистоннинг янги таклифларини қўллаб-қувватлашди. Бугун бўлиб ўтган мажлис якунида Қўшма ҳаракатлар режасига доир Тошкент декларацияси қабул қилинди», — деган эди Содиқ Сафоев