Шавкат Мирзиёев ва Покистон бош вазири Имрон Хон раислигида 3 март куни икки мамлакат расмий делегациялари иштирокида йиғилиш ўтказилди. Бу ҳақда Президент матбуот хизмати хабар қилди.
Қайд этилишича, унда сиёсий, савдо-иқтисодий, инвестициявий, транспорт ва логистика, туризм, маданият соҳаларидаги ҳамкорликни ривожлантириш масалалари муҳокама қилинган.
«Қадимий Буюк ипак йўлида жойлашган Ўзбекистон ва Покистон халқларини азалдан умумий тарих, ўхшаш тил ва бой маънавий мерос боғлаб туради. Биз бугун бу кўҳна анъаналарни қайта тиклаяпмиз. Давлатлараро муносабатларимиз стратегик шериклик даражасига кўтарилганидан мамнунмиз», – дейди Шавкат Мирзиёев.
Ўзбекистон раҳбари яқин истиқболда ўзаро савдо ҳажмини 500 миллион доллар, келгусида эса 1 миллиард долларга чиқариш имконияти борлигини таъкидлаб, бу борадаги муҳим йўналишларни кўрсатиб ўтган. Аввало, саноат соҳаларида кооперация дастурини, савдо айланмаси таркибини кенгайтириш бўйича «йўл харитаси»ни биргаликда ишлаб чиқиш зарурлиги қайд этилган.
Иккинчи муҳим йўналиш – мамлакат ва минтақалар ўртасида мултимодал транспорт, юк ва ҳаво ташувлари бўйича ҳамкорликни кучайтириш ҳисобланади. Транзит ва савдо битими кучга кирган, мунтазам юк ташувлари учун асос яратилган.
Мирзиёев транспорт-логистика соҳасидаги ҳамкорликни ривожлантириш бўйича лойиҳаларни амалга ошириш муҳимлигини яна бир бор таъкидлаган.
«Термиз—Мозори Шариф—Кобул—Пешовар темир йўли бизнинг умумий келажагимиздир. Бу йўл бица, Покистонни Марказий Осиё билан боғлайдиган, Ўзбекистонни Карачи, Гвадар ва Қосим портларига олиб чиқадиган энг яқин, арзон ва хавфсиз йўлакни яратамиз. Бу темир йўл минтақаларимиз қиёфасини бутунлай ўзгартириб юборади», – дея таъкидлайди Ўзбекистон раҳбари.
Музокарада ушбу лойиҳани янада илгари суриш бўйича келишувга эришилган. Доимий авиақатновларни қайта тиклаш истиқболлари муҳокама қилинган.
Икки мамлакат ҳудудлари ўртасида тўғридан-тўғри алоқалар ҳам ривожланаётгани айтилган. Жумладан, Наманган вилояти ва Панжоб музофоти ишбилармонлари кўплаб лойиҳаларни амалга оширмоқда. Келгусида Сурхондарё вилояти билан Хайбер-Пахтунхва провинцияси ва бошқа ҳудудларда ҳам ана шундай самарали ҳамкорликни йўлга қўйишга келишиб олинган/
Ўзбекистон президенти зиёратларни тизимли ташкил этиш мақсадида қўшма гуруҳ тузиш, икки мамлакат Туризм вазирликларининг ваколатхоналарини очишни таклиф қилган. Учрашувда илм-фан, экология, олий таълим, санъат, кино, спорт соҳаларидаги алоқаларга ҳам эътибор қаратилган.
Ҳукуматлараро комиссия ҳамраислари, вазирлар эришилган келишув ва келгусидаги режалар ҳақида ахборот берган. Шавкат Мирзиёев ва Имрон Хон уларнинг таклифларини қўллаб-қувватлаб, тегишли кўрсатмалар берган.
«Ўйлайманки, бугунги очиқ ва сермаҳсул мулоқотларимиз, имзоланадиган ҳужжатлар стратегик шериклигимизнинг янги истиқболли йўналишларини очади. Энг асосийси, биз – икки биродар бир-биримизни яхши тушунамиз. Биз қўйган катта марраларга эришиш учун ҳукуматларимиз доимий мулоқотда бўлишлари зарур», — деган Мирзиёев.
Эслатиб ўтамиз, Шавкат Мирзиёев 3–4 март кунлари Покистонга ташриф буюриши хабар қилинганди. Кейинроқ давлат раҳбари Покистонга жўнаб кетгани ва етиб боргани ҳақида хабар берилди.
Изоҳ (0)