1-mart kuni Shveysariyaning Mediterranean Shipping Company (MSC), Daniyaning Maersk va Fransiyaning CMA-CGM kompaniyalari Rossiyaga yuk konteynerlarini yetkazib berish hamda undan boshqa manzilga yo‘naltirishni to‘xtatdi.
MSC hamda Maersk ularning qarori oziq-ovqat, tibbiyot vositalari va ijtimoiy yuklar kabi birlamchi tovarlar yetkazib berilishiga nisbatan tatbiq etilmasligini bildirgan.
Marine Insight dengiz orqali yuk yetkazmalari sanoati nashrining yozishicha, MSC, Maersk va CMA-CGM dunyo bo‘yicha konteynerlar yetkazib beruvchi uch eng asosiy va katta kompaniyalar hisoblanadi.
Rossiyaga qarshi bir qator davlatlar, xususan YI, AQSh, Kanada, Yaponiya, Avstraliya va boshqa mamlakatlar sanksiyalar joriy etgan. Cheklovlar Rossiya banklari (“VTB” va “Sberbank” ham bor), Rossiyadan yuqori texnologiya mahsulotlarini eksport qilish, Markaziy bank, Moliya vazirligi, Rossiya taraqqiyot jamg‘armasi va katta davlat korporatsiyalari, Rossiya Xavfsizlik kengashi a’zolari, Davlat dumasi deputatlariga nisbatan ham tatbiq qilingan.
28-fevralda Vladimir Putin AQSh hamda boshqa g‘arb davlatlarining do‘stona bo‘lmagan harakatlari va xorij davlatlari, xalqaro tashkilotlarning cheklovlariga qarshi iqtisodiy chora-tadbirlar to‘g‘risida farmonni imzolagan.
Shuningdek, Buyuk Britaniya hukumati Ukrainadagi urushdagi bilvosita ishtiroki sabab Belarus mudofaa vazirining to‘rt o‘rinbosari hamda mamlakatning ikki mudofaa muassasasini sanksiyalar ro‘yxatiga qo‘shib qo‘ygan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)