Rossiya va Belarus terma jamoalari xokkey bo‘yicha xalqaro turnirlardan chetlashtirildi. Bu haqda Xalqaro xokkey federatsiyasi (IIHF) saytida xabar qilindi.
Qayd etilishicha, bu qaror “keyingi ogohlantirishgacha” qabul qilingan.
Hozircha IIHF Rossiya va Belarusning sentabr oyigacha bo‘lgan barcha musobaqalarni o‘tkazib yuborishini ma’lum qildi.
Shu tariqa Rossiya Finlyandiyada bo‘lib o‘tadigan kattalar o‘rtasidagi 2022-yilgi jahon chempionatida ishtirok etmaydi va o‘smirlar o‘rtasidagi jahon chempionatini, ayollar o‘rtasidagi jahon chempionatini, shuningdek, avgust oyida bo‘lib o‘tishi kerak bo‘lgan yoshlar o‘rtasidagi jahon chempionatini o‘tkazib yuboradi.
Shuningdek, Rossiya dekabr oyining oxirida Novosibirsk va Omskda boshlanishi kerak bo‘lgan yoshlar o‘rtasidagi jahon chempionatini o‘tkazish huquqidan mahrum qilindi. IIHF kelgusi oylarda musobaqani o‘tkazish uchun yangi joy bo‘yicha muzokaralarni boshlaydi.
Shuningdek, Yevroliga Ijroiya kengashi ham 28-fevral kuni Ukrainadagi vaziyat bo‘yicha qabul qilingan qarorlari e’lon qilindi. Unga ko‘ra, Rossiya basketbol jamoalarining Yevroliga (SSKA, UNIKS, “Zenit”) va Yevrokubokdagi (“Lokomotiv-Kuban”) ishtirokini to‘xtatishga qaror qilingan.
Bundan tashqari, Yevropa gandbol federatsiyasi (EHF) ham Rossiya va Belarus jamoalari hamda klublariga tashkilot shafeligidagi musobaqalarda qatnashish huquqidan mahrum qildi. Bu haqda EHF matbuot xizmati xabar berdi.
Qaror tashkilot ijroiya qo‘mitasining navbatdan tashqari yig‘ilishida qabul qilingan va klublar hamda jamoalar darajasidagi barcha musobaqalarga taalluqlidir.
Eslatib o‘tamiz, avvalroq FIFA va UEFA Rossiya futbol terma jamoalari hamda klublarini xalqaro musobaqalardan chetlatgandi.
Izoh (0)