Stranja—2022. Hasanboy Do‘stmatov qozog‘istonlik bokschini mag‘lub etib, oltin medal sohibiga aylandi

Bolgariyaning Sofiya shahrida boks bo‘yicha xalqaro an’anaviy Stranja Kubogi musobaqasining final bahslari 26-fevral, shanba kuni bo‘lib o‘tmoqda.

-51 kg vazn toifasida harakat qilgan Hasanboy Do‘stmatov qozog‘istonlik Damir Abdikadirga qarshi ringga chiqdi. O‘zbekistonlik bokschi raqibiga hech qanday imkoniyat qoldirmadi va g‘alaba qozondi.

Shu tariqa Do‘stmatov Stranja—2022 musobaqasida O‘zbekiston uchun ilk oltin medalni olib keldi.

Bundan avvalgi bosqichda Hasanboy qozog‘istonlik Temur Kabdeshovni mag‘lub etgandi. Chorak finalda rossiyalik Yevgeniy Martinov ustidan 5:0 hisobida g‘alaba qozongandi. Musobaqaning dastlabki bosqichida esa Do‘stmatovning raqibi ringga chiqmagan va to‘g‘ridan-to‘g‘ri keyingi bosqichga yo‘l olgandi. 

26-fevral kungi bahslarda Abdumalik Halokov, Mujibillo Tursunov, Odiljon Aslonov va Madiyor Saidrahimov oltin medal uchun kurash olib boradi. +92 kg vazn toifasida Lazizbek Mullajonov 27-fevral kungi dasturda o‘z jangini o‘tkazadi.

Avvalroq Tursunoy Rahimova ukrainalik bokschiga imkoniyatni boy berib, bronza medalini qo‘lga kiritgandi. Jahongir Rahmonov, Saidjamshid Ja’farov, Sohiba Ro‘zmetova, Rayhona Qodirova, Sitora Turdibekova, Mavluda Mavlonova esa musobaqa bilan erta xayrlashdi.