Jizzax viloyati hokimi Ergash Soliyev Shavkat Mirziyoyevga Qoraqalpog‘istonning Taxtako‘pir tumanida jamoasi bilan birga nimalar qilgani haqida hisobot berdi. Bu “Menimcha” ko‘rsatuvida namoyish etildi.
“Hurmatli prezident, sizning topshirig‘ingizdan keyin tumandagi 17 ta mahallaga barcha hokimlarni olib keldim. To‘rt kun davomida shu yerda yurdik. Biz o‘zimiz to‘liq tahlil qilib, birinchidan, hokim yordamchilarini obro‘sini ko‘tarish uchun hozirning o‘zida mingdan ortiq xonadonga 7,6 milliard so‘m homiylik qildik”, — dedi Ergash Soliyev.
Davlat rahbari hokimga “pulni o‘zing o‘tkazib berdingmi?”, deya savol berdi. Hokim bunga “ha, o‘zimiz o‘tkazdik”, deb javob berdi va shunday dedi:
“Qayergadir tovuq, qayergadir sigir berdik, yana 169 uyni qayta ta’mirlab berdik. Hozircha viloyat budjetimizdan jamg‘arma tuzdik. Bu jamg‘arma Taxtako‘pir tumanini iqtisodiy-ijtimoiy rivojlantirish uchun. Bu jamg‘armaga mahalliy budjetdan 30 milliard so‘m ajratamiz. Nimalar qilishim bo‘yicha yo‘l xaritasi bor”.
Avvalroq Shavkat Mirziyoyev Beruniy tumaniga qo‘shimcha tarzda 50 milliard so‘m ajratilishini ma’lum qilgan edi. Shuningdek, Toshkent viloyati hokimligi Mo‘ynoq tumanida tibbiyotni rivojlantirish uchun 32 milliard so‘m ajratishi haqida xabar berilgandi.
Mavzuga doir:
- “Prezident bilan bir kun”: Shavkat Mirziyoyevning Qoraqalpog‘istondagi dastlabki kuni qanday o‘tdi?
- Hududlarga biriktirilgan viloyat hokimlari, kichik tumanlarga beriladigan katta mablag‘lar, qiymati 108 million dollar bo‘lgan shamol elektr stansiyasi — prezidentning Qoraqalpog‘istonga tashrifidan keyingi xulosalar
Izoh (0)